"Şəhidlərimizi hər gün anaq” layihəsindən bu dəfə Neftçalanın ilk şəhidi Mehman Səfərov haqqında...
Səfərov Mehman Məmmədəli oğlu 1972-ci il Aprel ayının 12-də Neftçala şəhərində dünyaya göz açıb.Bu gün adını daşıyan Neftçala İnternat məktəbinin 8-ci sinifini bitirib.Təhsilini davam etdirmək üçün Bakıya yollanır. Bakıdakı Mədəni-Maarif texnikomunun rəqs şöbəsinə daxil olur.
1991- ci ildə hərbi xidmətə yola düşür.1992- ci il iyul ayının 15-də Ağdərə rayonu Umudlu kəndi uğrunda gedən döyüşlərdə qəhrəmancasına həlak olub.İyul ayının 18-də Neftçala Şəhidlər xiyabanında son mənzilə yola salınıb.
Orta təhsil aldığı internat məktəbi hal-hazırda Mehman Səfərovun adını daşıyır.Məktəbin həyətində büstü qoyulub.
Dini-Adəm, yolumuz haqq yoludur,əlbət hədəf,
Adı Mehman olanın mehmanı olmaq nə şərəf.(E.İbrahim)
Mehman Səfərov haqqında internet resusrları üzərindən axtarış apararkən üzücü xəbərlə rastlaşırıq.Mehman Səfərovun atası Məmmədəli kişi ötən ilin may ayında mətbuatda dərc olunan yazılarda küçə qaldığı, Binəqədi rayon icra hakimiyyətində isə "oğlunun ağlı olaydı,Qarabağa döyüşməyə getməzdi” deyə insanlığa sığmayan cavab veriblər.Uluyol.info yerli saytlara istinadən həmin yazılardan çıxarış edib şəhid atasının düşdüyü durumu oxuculara çatdırırıq:
Uluyol.info ötən ilin may ayında şəhid atası ilə bağlı mediyadakı məlumatları və videodan çıxarışları təqdim edirik:
Bura şəhid atası Məmmədəli Səfərovun evi deyil. Onu bir
neçə gün öncə avtobusda yatılı görən gənc oyadıb müvəqqəti olaraq qaldığı evə gətirib.
64 yaşlı kişi iki gün sonra buranı da tərk etməlidir. Hara gedəcəyini, harada
gecələyəcəyini bilmədən... "Bolluq bazarında kafedə işləyirdim, orada da
qalırdım. Hökumətdən heç nə tələb etmirdim, ev istəmirdim. Buna ehtiyacım yox
idi. Elə oldu ki, Bolluq bazarı plana düşdü, satıldı. Mən də oradan çıxdım,
qaldım küçələrdə”- Məmmədəli Səfərov danışır.
Onun oğlu Mehman Səfərov 19 yaşında Ağdərədə gedən döyüşlərdə şəhid olub.
Neftçalada yerləşən internat məktəbə onun adı verilib, qarşısına büstü də qoyulub.
Amma indi ataya oğlu şəhid olduğu üçün ödənilməli olan 11 min manat sığorta
pulu verilmir ki, özünə sığınacaq düzəltsin. Binəqədi rayon İcra Hakimiyyətindən
də ona deyiblər ki, "oğlunun ağlı olardı, müharibəyə getməzdi”. "Danışırdım ki,
uşaq özü getdi müharibəyə. İcra hakimiyyətində işləyən bir adam, bilmədim
kimdi, mənə qayıtdı ki, "ağlı olardı, getməzdi”. Dedim, ağlı var idi ki,
müharibəyə gedib. Amma ağlı yoxdur ki, sizə görə gedib. Siz kresloda
oturmusunuz. Sizin oğlunuzun hansı biri cəbhəyə gedib? Hansı biri əsgərlik edib
? Bir nazir oğlunun adın çəkə bilərsiniz mənim üçün ki, o əsgərliyə gedib? Nə
oldu, "qara millət” ə qalmışdı bu?!”
O yay-qış küçələrdə, parklarda, avtobuslarda, dəniz kənarındakı yarımçıq
tikililərdə qalır. Amma ona qoyulan diaqnoz bu yerlərdə qalmağı qadağan edir. Məmmədəli
Səfərov ağ ciyər vərəmi xəstəliyindən 2-ci qrup ömürlük əlildir.
Şəhid atası ev almaq üçün Binəqədi rayon İcra Hakimiyyətinə müraciət edib. İcra
Hakimiyyəti onun şəhid atası və ömürlük 2-ci qrup əlil olmasını nəzərə alaraq
ev növbəsinə salıb. 2015-ci ildən ev növbəsində olan Məmmədəli Səfərova Əmək və
Əhalinin Sosial Müdafiəsi Nazirliyindən deyiblər ki, o, 2018 –ci ildən sonra ev
alacaq.
Binəqədi rayon İcra Hakimiyyətinin İctimai-siyasi və humanitar məsələlər şöbəsinin
baş məsləhətçisi Rəvanə Əliyeva deyir ki, şəhid atasının ev növbəsinə yazılması
ilə bağlı sərəncam versələr də, ona növbədənkənar ev vermək qurumun səlahiyyətində
deyil.
İcra Hakimiyyətindən bildirdilər ki, Əmək və Əhalinin Sosial Müdafiəsi Nazirliyi
şəhid atasına növbədənkənar ev vermək səlahiyyətindədir. Amma Nazirliyin
ictimaiyyətlə əlaqələr şöbəsinin müdiri Elman Babayev bu səlahiyyətin icra
hakimiyyətində olduğunu deyir.
"Şəhid adının əbədiləşdirilməsi və şəhid ailələrinə edilən güzəştlər haqqında”
qanunun 4-cü maddəsinə əsasən "Mənzil şəraitini yaxşılaşdırmağa ehtiyacı olan şəhid
ailələri yaşayış sahəsi ilə birinci növbədə təmin olunurlar”. Bu işin təşkili
Müdafiə Nazirliyinə, yerli icra hakimiyyəti orqanlarına, Əmək və Əhalinin
Sosial Müdafiəsi Nazirliyinə həvalə olunub.
Şəhid atasının isə ancaq əynindəki paltarıdır, başqa heç nəyi yoxdur. Nə maşını, nə evi, nə də işi. 64 yaşlı kişi düşünür ki, oğlu sağsalamat olsaydı, bu yoxluğu çəkməzdi".
Uluyol.info olaraq şəhidlərimizin ad günü və şəhadət günü ilə əlaqədar reportajlar hazırlayırırq.Bu dəfə şəhid Mehman Səfərovun doğum günü aprelin 12-si hazırladığımız reportaj gecə saatlarına təsadüf etdiyindən hal-hazırda şəhid atası Məmmədəli kişinin mövcud durumu haqqında bilgi əldə edə bilmədik.
Bizi izləyin, şəhid atasının hazırda harda yaşadığı, ev problemi və alacağı təzminatın ödənilib-ödənilməsi haqqında məlumat vərəcik.
Uluyol.info, Saday Fərəcov