Səbuhi Rəhimli: "Hər şey insanın beynindədir, kənar təsirlər boş şeydir”
Cadu-piti, qurd yağı, fal və sairə... Təəssüf ki, indiki zəmanəmizdə belə hələ də bu kimi şeylərə inananlar var. Bu günlərdə Bakıda Günəşli qəbiristanlığında 8 ay əvvəl vəfat etmiş atasını ziyarətə gedən oğul atasının başdaşında təxminən 30-35 yaşlı bir nəfərin şəklinin yapışdırıldığını görüb. Zərərçəkmiş iddia edir ki, şəxsin şəklinə cadu edilərək atasının məzarına yapışdırıblar.
Yardımlıda isə 65 yaşlı qadının cadu nəticəsində öldüyü iddia edilir. Belə ki,
evindən cadu tapan qadın 8 gün sonra yatağa düşüb, 3 ay sonra isə dünyasını dəyişib.
Ailə bunda qonşu kənddə yaşayan mollanı günahlandırır. Ailə üzvləri hətta iddia
edir ki, bu cadu nəyinki qadının ölümünə digərlərinin də ailələrinin
dağılmasına gətirib çıxarıb. İttihamlara cavab verən molla isə sadəcə şirinlik
duası yazdığını bildirib.
Bu cür mövhumata inananlar qədər inanmayanlar da kifayət qədərdir. Hazırda cadu
edən və ya onu çıxaran, ağ, qara magiya ilə məşğul olan, özünü görücü hesab edən
kifayət qədər insanlar var. Hətta onlar özlərini internetdə də təbliğ edir, özlərinə
müştəri yığırlar. Hətta iş o yerə qalıb ki, baxıcılar internet, telefon vasitəsi
ilə də xidmət göstərir və bununla da fəxr edirlər. Cadugərlər müxtəlif məlhəmlərdən,
ölü torpağında, bayquş sümüyündən, mirvari daşından, düyünlənmiş saplardan,
tilsimlənmiş əşyalardan, pişik tükündən, qurd yağından və s. istifadə edirlər.
Bir sözlə qeyri adi ağıllarına nə gəlirsə, həmin şeylərdən istifadə edilər. Bunların
içərisində insanları daha çox qorxudan "qurd yağı”dır. Bir sıra insanlar "qurd
yağı”nın ailə dağıtdığını, kişini, qadını sonsuz etdiyini, hətta insanları
öldürdüyünü belə düşünür və buna inandıqları üçün ciddi təşviş və həyəcan
keçirirlər.
Astroloq Səbuhi Rəhimli bu cür insanlarla mübarizə apardığını bildirdi:"Peyğəmbərimizin bir müqəddəs hədisi var ki, deyir ki, belə şeylər ancaq inanana təsir edə bilər. Mən bu peşəni ona görə seçmişəm ki, bu cür insanlarla mübarizə aparım. Hər şey insanın beynindədir, kənar təsirlər boş şeydir. İndiki zəmanədə bu cür cadu-pitiyə inanan insanları görəndə bu mənə qəribə gəlir. 20-ci əsrdir, texnologiya zirvəsinə çatmışıq bunlar hələ də bu cür şeylərə inanırlar. Bu da maariflənmənin ləng inkişafından, insanların cahil inanclarından qurtulmamağından, dini savadsızlığından bunlar doğur. 21 dekabrda dünyanın dağılacağı deyilirdi. Hansısa universitetdə işləyən professor zəng edib deyirdi ki, 21 dekabrda dünya dağılacaq, axı mən uşağıma toy etmək istəyirdim, arzularım ürəyimdə qalacaq. Baxırsan ki, professor olmaqla deyil, gərək insanın bilgisi olar. Yaxud da ötən il noyabrda deyirdilər ki, 8 gün qaranlıq olacaq. Adi astronomik biliyi olan insan bilir ki, ən böyük planet yerin lap yaxınlığından keçsə belə 8 gün qaranlıq ola bilməz. Bunların hamısı insanların maariflənməməyindən irəli gəlir”.
S.Rəhimli insanların falçı yanına istədikləri
şeyi eşitmək və rahatlıq tapmaq üçün getdiyini dedi:"İnsanlar
istədiyi şeyi eşidəndə rahatlıq tapır. İstənilən falçının yanına biri gedəndə
deyəcək ki, sənin işlərində problem var, bir yerə çıxa bilmirsən. Bu kod kimi
bir şeydir. Bu insanın təbii ki, problemi var ki, sənin yanına gəlib. Başlayır
insanı tərifləməyə ki, səni heç kim başa düşmür, sənə nəsə ediblər. İndi
müharibə şəraiti bir tərəfdən, iqtisadi çətinlik bir tərəfdən ailə qurmağı
gecikdirən minlərlə qız var. Falçı yanına gedən kimi demir reallıq budur. Deyir
sənin yolunu qohum əqrəbalardan kök bir adam bağlayıb. Bu isə insanın içində
xof, şübhə həm də ətrafdakılara qarşı nifrət yaradır. Hamının qohumunda kimsə
kök adamlar var. Bu şəxs həmin kök adamlara qarşı heç kimin xəbəri olmadan nifrət
etməyə başlayır. Buna inanan insanlar bədbəxt olub gedib. Bütün bunlar boş şeylərdir”.
Ümumiyyətlə İslamdan əvvəlki Ərəbistan mühitində
cadugərliklə əsasən qadınlar məşğul olurdular. Onların cadu üsullarından biri də
bundan ibarət idi:bir ip götürüb, müəyyən adamın adına əfsun
(tilism) oxumaqla ipə düyünlər vururdular. Bununla da həmin adamın işlərinin
ldüyünə düşəcəyinə», xoşbəxtliyinin bağlanacağına, uğur və səadətin ondan üz
çevirəcəyinə, başına ən müxtəlif bəlalar gələcəyinə inanırdılar. Sehrin və
cadunun günah əməl olması barədə Məhəmməd Peyğəmbər (s) bunları buyurub: "Hər
kim ipə düyün vurub əfsun oxusa, sehr etmiş sayılır. Sehrlə məşğul olan isə
şirk etmiş olur. Kim (özünü qorumaq üçün) öz üzərinə nə isə taxsa, taxdığı əşyanın
öhdəsinə buraxılır Allahın himayəsindən çıxmış olur. İslam Peyğəmbəri müsəlmanlara
yeddi günahdan uzaq olmağı tapşırırdı ki, bunların sırasında ikinci yeri sehr
tutur. İmam Əli isə sehr və cadunu öyrənmək istəyənlərə bu cür xəbərdar edirdi:
”Kim az və ya çox miqdarda sehr öyrənsə, küfr etmiş olar və Allahla bağladığı əhdi
qırar. Tövbə etməyincə onun cəzası edamdır".
Günel MANAFLI, musavat.com