Maraqlıdır, bu ölkənin qeyri-məhdud səlahiyyətlərə malik olan Prezidentini, Ali Baş Komandanını rahat buraxmayan duyğu nədir?

Bu sözləri Müsavat başqanı Arif Hacılı öz "Facebook” səhifəsində yazıb.

"Yaşar Türkazər zəng vurmuşdu.

Ağdamın kəndlərində olub. Əhalinin acınanaqlı dolanışığından, su qıtlığından əziyyət çəkmələrindən, başlıcası isə qorxudulub vahimə içində yaşamalarından danışdı.

…Bu gün marketə getmişdik. Təqribən yaşıdım olan bir nəfər bir banka "Sana” yağı, yanındakı nəvəsinə isə "kinder sürpriz” almışdı. Buna da pulu çatmadığı üçün sıxılırdı, amma tanıdığım bu adam üçün mənim bunu başa düşməməyim çox vacib idi…

Mənim Zeynəb nənəm danışardı ki, Həzrət Əli döyüşlərdə olanda Fatimeyi Zəhra çörəyi gün altında qurudub yeyirmiş.

Deyirmiş ki, bizim uğrumuzda quru çörək yeyənlər varsa, bizə yumşaq çörək halal olmaz.

Ölkəmin bu durumu, işğal altındakı torpaqlarımız, yurdlarını tərk etməyə məcbur olmuş, əyilmədiyi, indiki vəhşi qaydalara uyğunlaşa bilmədiyi üçün yoxsulluğa məhkum edilmiş milyonlarla vətəndaşımızın acı həyatı məni çox incidir.

Müsavat başqanı kimidərk etdiyim məsuliyyət hissi, vəziyyəti dəyişdirə bilməməyimin məyusluğu məni əzir.

Son illər məni rahat buraxmayan əsas duyğu budur.

Maraqlıdır, bu ölkənin qeyri-məhdud səlahiyyətlərə malik olan Prezidentini, Ali Baş Komandanını rahat buraxmayan duyğu nədir?

O, qeyd etdiyim məsələlərə, ölkə vətəndaşlarının faciəli həyatına görə də məsuliyyət daşıyan birinci şəxs olduğunun fərqindədirmi?” – Arif Hacılı yazıb. //bastainfo.com