Bu gün siyasi təşkilatların rəhbərləri, vətəndaş cəmiyyəti fəalları və bir qrup mətbuat nümayəndələrinin iştirakı ilə Gözəl Bayramlının qanunsuz həbs olunması ilə bağlı toplantı keçirilib. Toplantıda Müsavat başqanı Arif Hacılı, AXCP sədri Əli Kərimli də, iştirak ediblər.
Bu barədə hüquq müdafiəçisi Oqtay Gulalıyev məlumat yayıb.
Məlumatda deyilir:
"Gozel Bayramli ilə bağlı toplantımız baş tutdu. Toplantıda müxtəlif siyasi təşkilatların rəhbərləri, vətəndaş cəmiyyəti fəalları və mətbuat nümayəndələri iştirak etdi.
Gözəl xanım başda olmaqla siyasi məhbusların müdafiə olunması ilə bağlı silsilə toplantıların, birgə etiraz aksiyalarının, mitinq, aclıq aksiyası, beynəlxalq kampaniyalar və s. keçirilməsi ilə bağlı təkliflər səsləndi.
Müzakirələrimiz və mübarizəmiz davam edir. Dəstək olan hər kəsə təşəkkür edirik!”
XATIRLATMA
AXCP sədrinin müavini Gözəl Bayramlı dünən saxlanılıb. İlk olaraq bu haqda AXCP sədri Əli Kərimli sosial şəbəkədə məlumat yayıb.
Əli Kərimlinin məlumatına görə, Gözəl Bayramlı Gürcüstandan qayıdarkən Azərbaycan sərhəddində, Sınıq Körpü sərhəd keçid məntəqəsində saxlanılıb: "Dostlar, indicə müavinim Gözəl Bayramlı zəng etmişdi. Gözəl xanım xeyli müddətdir ki, Gürcüstanda müalicə olunurdu. Gürcüstandan müalicənin növbəti mərhələsindən qayıdan zaman Qazax gömrük məntəqəsində Gözəl Bayramlının çantasına nəsə atıb (hələ, nə olduğu bilinmir) onu saxlayıblar”.
AXCP sədri hadisə ilə bağlı hakimiyyətə müraciət edib. O, qadin siyasətçinin şərlənməsinin pis nəticələr verə biləcəyini deyib:
"Bütün qırmızı xətləri keçməyin! Unutmayın ki, bir gün bütün bunlara görə cavab vermək də var!” – Əli Kərimli yazıb.
Xatırladaq ki, Gözəl Bayramlının həbs olunması barədə dünən Səbail rayon məhkəməsində qərar verilib. Qərara əsasən, G. Bayramlı barəsində 3 ay müddətinə həbs qətimkan tədbiri seçilib.
Könül Alı, bastainfo.com