Tehranın fəlakət bölgəsinə laqeyd münasibəti qəzəblə qarşılandı; deputat: "Bu dəfə də sel Azərbaycanın ürəyini dağladı”; Aqil Səmədbəyli: "Əbülfəz Elçibəyin yeri görünür”
İran hökumətinin Azərbaycan şəhərlərində baş verən daşqınlarla bağlı lazımi tədbirlər
görməməsi, eyni zamanda ölkənin rəsmi mətbuat orqanlarında hadisələrin düzgün
işıqlandırılmaması parlamentdəki azərbaycanlı millət vəkillərini, Türk
Farnskiyası üzvlərini qəzəbləndirib.
Təbrizin millət vəkili, Türkdilli Bölgələr Fraksiyasının
rəhbəri Məsud Pezeşkiyan hadisə ilə bağlı başsağlığı mesajı ünvanlayaraq
bildirib ki, təbii fəlakətlər məsələsində önləyici tədbirlər almaq, kontrol etmək
və hadisəni nəzarətdə saxlamaq olduqca önəmlidir. "Ümid edirəm ki, məsullar təbii
fəlakətin daha çox ziyan verməsinin qarşısını alacaq və bu barədə ictimaiyyəti
məlumatlandıracaqlar. Bir sel hadisəsinin bu qədər insanın ölümünə səbəb olması
ilə razılaşmaq çox çətindir”- millət vəkili vurğulayıb.
Urmiyənin millət vəkili Nadiq Qazipur isə mövzu ilə bağlı parlamentdə çıxış
edib. O baş verən hadisəyə görə ölkədə matəm elan olunmadığı üçün öz
narazılığını bildirib.
Şəbistərin millət vəkili Məsumə Ağapur da dövlət yetkililərini sərt tənqid edərək onların bölgəyə baxışlarının dəyişməsini tələb edib. "Ötən il də Şəbistər bölgəsində oxşar təbii fəlakət baş verdi, hadisə nəticəsində çoxları evsiz qaldı, bir çox əkinçi isə müflis oldu. Lakin hadisədən 10 ay keçməsinə baxmayaraq hələ də təbii fəlakətdən zərərçəkənlərə heç bir yardım edilməyib. Keşkə Şərqi Azərbaycan Vilayəti də məsulların gözündə Xuzistan, Xorasan və ya Rəşt kimi olardı. Onlara ən kiçik təbii fəlakət zamanı yetəri qədər yardım edilir və lazımi tədbirlər alınır, lakin Şərqi Azərbaycan sankı bir istisnadır...”- deyə millət vəkili qeyd edib.
Qoşaçayın millət vəkili Cahanbəxş Mohebbi Niya
İran Teleradio Şirkətini sərt tənqid edərək deyib:"Ötən gün hadisə ilə bağlı iki ekspert
danışırdı. Onlar elə söhbət edirdi ki, sankı günahkar hadisə nəticəsində həyatını
itirənlərdir. Xeyir, bu belə deyil. Əsas məsələ yanlış idarəçilik məsələsidir.
Ötən yayda Çitçiyanın yanında dedim ki, bölgədəki çayların vəziyyəti heç yaxşı
deyil. Əgər müəyyən tədbirlər alınmasa yazda daşqınlarla üzləşəcəyik. Elə dediyim
kimi də oldu”- deyə Mohebbi Niya əlavə edib.
Urmiyənin millət vəkili Hadi Bahaduri də baş verən təbii fəlakətlə bağlı məsulların
fəaliyyətini tənqid edib. "Təəssüflər olsun ki, bu dəfə də sel Azərbaycanın ürəyini
dağladı. Onlarla insan həyatını itirdi, bir neçə nəfər hələ də itkindir.
Sel-daşqın suları Urmiyə, Sulduz, Azərşəhr, Üşnəviyyə, Əcəbşer və Təbriz şəhərlərini
bürüdü, bölgə əhalisinə çoxlu ziyan dəydi. Mən təbii fəlakətdən zərər çəkən
bütün ailələrə başsağlığı verir və Böhran Müdiriyyəti Təşkilatından var gücü ilə
bölgə əhalisinə yardım etməyi gözləyirəm. Milli Hidrometeorologiya Təşkilatı isə
hava şəraitinə dair vaxtında proqnoz verib və hərkəsi məlumatlandırmalı idi. Bu
şəkildə itkilərin və dəyən ziyanın həcmini azaltmaq mümkün olardı. Baş verən
hadisənin Teleradio Şirkəti və kütləvi informasiya vasitələrində daha geniş şəkildə
işıqlandırılmasını gözləyirəm”- deyə millət vəkili yaydığı mətndə qeyd edib.
İran Böhran Mərkəzinin rəisi isə dövlət televiziyasındakı çıxışında yalan
açıqlama yayaraq sadəcə "şəhər kənarına gəzintiyə çıxanların” öldüyünü iddia
edib. Həmçinin İran qəzetlərinin əksəriyyəti hadisə ilə bağlı xəbərləri təhrif
etməyə çalışıblar. Onlar bölgəni bürüyən təbii fəlakətlə bağlı xəbərləri "sel gəldi
tamaşaçıları apardı”, "Seyr etməyə qurban gedənlər” və s. kimi başlıqlar
altında yayıblar. GünAz TV-nin məlumatına görə, İran Tibbi Ekspertiza Mərkəzinin
İctimaiyyətlə Əlaqələr Şöbəsi Azərbaycan və Kürdistan şəhərlərində daşqınlarda
ölənlərdən 32-nin adını açıqlayıb. Ölənlərin sayının 48 nəfər olduğu
bildirilir, lakin itkin düşənlərin sayı dəqiq deyil. Fəlakət bölgəsinə Bakı və
Ankaranın yardım etməsi də zəruri sayılır. Lakin İranın yardım üçün müraciət
etməməsi bu istiqamətdə addımların atılmasına imkan vermir.
BAB Rəyasət Heyətinin sədri Aqil Səmədbəyli
"Yeni Müsavat”a bildirdi ki, təbii fəlakət nəticəsində Azərbaycanın Güneyindəki
soydaşlarımız ağır duruma düşüblər:"Bu təbii fəlakət İran rejiminin bizə
nə qədər yad olduğunu bir daha göstərdi. Əslində bu da ibrət almalı bir məsələdir.
Millətimizin gözünün açılması baxımından yaxşı haldır. Bizim təbiətə üsyan etmə
haqqımız yoxdur, ancaq bizim təbii fəlakətin nəticələrinin aradan
qaldırılmasına məsul olub, məsuliyyətsizlik edənlərə qarşı üsyan etmək haqqımız
var”. İran rejiminin bizə yad olduğunu deyən A.Səmədbəyli Azərbaycan
Respublikasının rəhbərliyinin 50 milyonluq Azərbaycanın böyük bir parçasına kömək
əlini uzatmasını zəruri saydı: "Əməl hər şeydən önəmlidir. Sadəcə, nitq söyləməklə
iş bitmir. Millətimizin, Azərbaycanımızın başı sağ olsun! Ölənlərə rəhmət,
yaralılara şəfa diləyirəm. Tarix hər şeyi bir yerə həkk edir. Zaman en ədalətli
hakimdir. Yenə də Əbülfəz Elçibəyin yeri görünür”.
Cavid TURAN, musavat.com