20 yaşlı Cəbrayıl Cəbrayılova ötən ilin fevral ayında
keçdiyi müayinə zamanı yanlış diaqnoz qoyulur. Bir müddət dərman qəbul etsə də,
problem getdikcə şiddətlənir: "Əvvəlcə dedilər ki, qurdu var. Ondan sonra
qurda qarşı 2 ay müalicə yazdılar, gördülər ki, heç bir nəticəsi yoxdur. Təngnəfəsliyim
elə olduğu kimi qalır. Ondan sonra yoxlanışa gedəndə dedilər ki, yox, səndə
başqa şeydir. Yoxlanışa gedəndə dedilər ki, ürək iki dəfə böyüyüb. Həkimə
getdik, həkim də dedi ki, bunun tək çarəsi ürək köçürülməsidir".
Bakıda qoyulan "ürəyin kompakt olmayan kardiomiopatiyası" diaqnozu
müayinə olunmaq üçün getdiyi Türkiyədə də təsdiqlənir: "Sadəcə, dərmanlar
yazdılar ki, ürək üç-beş il işləyə bilər. Səhiyyə Nazirliyinə müraciət eləmişik.
İki dəfə müraciət olunub. Dedilər ki, vəsait yoxdur".
Cəbrayıl deyir ki, xəstəliyi səbəbindən qaraciyər, qarın nahiyəsi və ayaqlarına
su yığılır ki, bu da həmin orqanlarda ağrıya səbəb olur. Ona görə də mütəmadi dərman
qəbul etməlidir: "Mən dərman atmasam, hardasa iki-üç gün mənim ayağım da,
mədəm də şişəcək. Həqiqətən də elə oldu. Hardasa üç-dörd gün dərman qəbul eləyə
bilmədim, vəziyyətim daha da pis oldu".
Anası Billurə Qurbanova deyir ki, xəstəliyinə görə Dövlət Dəniz Akademiyasında
təhsilini dayandıran Cəbrayılın xəstəlikdən xilası üçün döymədikləri qapı
qalmayıb. Qəzalı vəziyyətdəki yataqxana binasında yaşayan Cəbrayılovlar ailəsi
2014-cü ildə avtomobil qəzasına düşüb. Nəticədə onların 21 yaşlı qızı həyatını
itirib. İndi valideynlərin tək ümidi Cəbrayılın sağalacağına, normal həyata dönəcəyinədir:
"Təsəvvürünüzə gətirin, hər gecə gözünün qabağında gənc bir oğlunun o vəziyyətini
görmək nə qədər ağır ola bilər? Mən artıq 21 yaşında qızımı itirmişəm. Biz
Allaha həmişə şükür eləyən insanlar olmuşuq. Həmişə də şükür eləyirəm. Necə
var, qəbulumuzdur. Övlad üçün adam düşmənə də müraciət eləyər. Çünki övladdır.
İnsana övladdan yaxın nə ola bilər ki? Düşmənin də qapısını döyərəm övlad
üçün".
Qeyd edək ki, ürək transplantasiyası əməliyyatının icrası Belarus və İsraildə
mümkündür. Bunun üçün isə ümumilikdə 200 min dollar vəsait tələb olunur.
Cəbrayıla dəstək olmaq istəyənlər bank hesab nömrələri vasitəsilə maddi yardım
göstərə bilərlər: AZ69IBAZ33881019441876340356
Ünvan: Buzovna qəsəbəsi. Rasim İmanov küçəsi.: 1 nömrəli yataqxana
Telefon: (+99412) 453-11-82, (+99450) 520-59-05, (+99455) 238-19-65
Uluyol.info
