Razi Nurullayevin rəhbərlik etdiyi AXCP-də iki gənc fəal polis tərəfindən saxlanıldı.
Belə ki, AXCP Gənclər Təşkilatının sədri Təbriz Mirzəyev və AXCP GT-nın fəal üzvü Elçin Səmədov Fəvvarələr meydanında polis əməkdaşları tərəfindən saxlanılaraq Səbael rayon 9-cu polis bölməsinə aparılıb.
Onların polisə aparılma səbəbi hələlik açıqlanmasa da, gənclərin sosial şəbəkədəki fəallığına görə saxlandığı ehtimal edilir.
Partiya sədri Gənclərin saxlanılmasına reaksiyası bu cür oldu:
"Bizim Gənclər Təşkilatının hazırlıq komitəsinin sədri Təbriz Mirzəyev və GT-nın fəal üzvü Elçin Səmədov Fəvvarələr meydanında mülki geyimli polis əməkdaşları tərəfindən saxlanılaraq Səbail rayon 9-cu polis bölməsinə aparılıblar.
Bu həbsləri qətiyyətlə pisləyir və bunu siyasi fəallara qarşı qisas aktı kimi dəyərləndirirəm. Bir yandan ölkədə azad sözdən, siyasi azadlıqlardan, demokratik inkişafdan bəhs edən siyasi hakimiyyət repressiya fəaliyyətini davam etdirir. Hər iki gənc sosial şəbəkələrdə ciddi fəallıq göstərir və görünən odur ki, onlar izlənib və saxlanıblar.
Hakimiyyəti siyasi fəallara qarşı qisas aksiyasını dayandırmağa və vətəndaşları qorxu altında saxlama praktikasına son qoymağa çağırırıq. Bu cür qərəzli yanaşmalar aramızda olan uçurumu daha da dərinləşdirəcək və təbii ki, bizi də tutduğumuz haqq yolundan döndərə bilməyəcəkdir"-Razi Nurullayev "facebook" hesabında yazıb.
Uluyol.info, Tural İNTİQAM