Günahkarlar hələ də sərbəst gəzib dolanır
Ermənilər Xocalıya 523 milyon ABŞ dolları məbləğində
ziyan vurub. APA-nın xəbərinə görə, bunu Hərbi Prokurorluğun Xüsusi istintaq
şöbəsinin mühüm işlər üzrə böyük müstəntiqi, ədliyyə müşaviri Ülvi Əhmədov
deyib. O bildirib ki, 39 nəfərin Xocalı soyqırımında iştirakı tam sübuta
yetirilib: "39 nəfərdən 18-i o vaxt Xankəndində yerləşən 366-cı motoatıcı
alayın zabit və gizirləridir”.
Ü. Əhmədov qeyd edib ki, Xocalı soyqırımı ilə bağlı başlanmış cinayəti işi çərçivəsində
7500-dən artıq istintaq hərəkəti aparılıb.
Xocalı soyqırımından keçən uzun illər ərzində faciənin əsas səbəbkarları hələ də
cəzalandırılmayıb. Artıq bu qətliamı törədənlərin sayı rəsmi şəkildə bəyan
edilib. Onların etdikləri cinayətə görə cavab vermələri üçün yetər ki ciddi tədbirlər
görülməlidir.
Hərbi ekspert Üzeyir Cəfərov Rusiyanın 366-cı motoatıcı alayının komandiri Yuri
Zarviqorov və bu faciədə əli olanların yerinin bəlli olduğunu söyləyir. Belə
bir vəziyyətdə, onları indiyədək məsuliyyətə cəlb etmək elə də çətin
olmamalıydı:
"Xocalı soyqırımında iştirak edən Yuri Zarviqorov, Seyran Ohanyan, Aleksandr
İvanov və digərlərini tutmaq mümkündür. Lakin bu istiqamətdə göstərilən
prinsipiallıq Lapşinin tutulması yönündəki inadkarlıqdan qat-qat aşağıdır. Adıçəkilən
adamların konkret yeri məlumdur. Onlar Rusiya, Gürcüstan və digər ölkələrə sərbəst
gedib gəlirlər. Bu adamları İnterpol xəttiylə çox rahat şəkildə həbs etmək
olar. Primakov, Yazov ölüb, bu gün-sabah da Qorbaçov gedəcək. Faciədə əli
olanlar bəs nə vaxt cəzasını alacaq?! Hər il 20 Yanvar, Xocalı faciəsinin
ildönümünü qeyd edirik. Lakin iş bununla bitmir. Faciəni törədənlər axır ki cəzasını
almalıdır. Əfsus ki, onların tutulması yönündə prinsipiallıq nümayiş etdirilməməsinin
səbəbləri mənə aydın deyil”.