Dekabrın 21-də Azərbaycanda baş verən ikinci devalvasiya dünya mətbuatının da gündəminə çevrilib.
Belə ki, dekabrın 25-də Türkiyədə yayımlanan ON4 telekanalının ana xəbər buraxılışında ikinci devalvasiya barədə reportaj hazırlanıb. İkinci dəfə baş verən devalvasiyadan sonra yaranmış sosial-iqtisadi böhranın miqyası göstərilib, əhalinin etiraz əhvalına kökləndiyi vurğulanıb.
Uluyol.info "Arqument.Az"-a istinadən xəbər verir ki, telekanal bu mövzuda Müsavat Partiyası başqanı Arif Hacılının da fikirləri öyrənib.
Müsavat başqanı yaranmış fəlakətli vəziyyəti Azərbaycan hakimiyyətinin uzun illər apardığı yanlış siyasətin nəticəsi olaraq qiymətləndirib, daha ciddi çətinliklərin hələ irəlidə olduğunu bildirib.
Arif Hacılı mövcud vəziyyətin Müsavat Partiyasının strukturlarında və digər ictimai təşkilatlarla birlikdə müzakirə olunduğunu qeyd edib.
Qarşıdan gələn 2016-cı ilin Azərbaycan üçün çətin il olacağını qeyd edən Müsavat başqanı vurğulayıb ki, əgər hakimiyyət siyasi və iqtisadi islahatlara əl atmazsa, xalqın və beynalxalq birliyin çağrışlarını dinləməzsə, ən əsası siyasi məhbuslar azadlığa buraxılmazsa cəmiyyətdə ciddi qarşıdurmaların qaçılmaz olacaq.
Arif Hacılı Müsavat Partiyasının Azərbaycan cəmiyyətinin maraqlarını sona qədər müdafiə edəcəyini xüsusi olaraq qeyd edib.
Həmin videosujeti təqdim edirik:
ULUYOL.İNFO