Fevralın 4-ü "Dünya Xərçəng Günü”dür. Bu günün qeyd olunmasında məqsəd dünyanın diqqətini xərçəng xəstəliyinə, onun aşkarlanmasına, müalicəsi və aradan qaldırılması yollarına çəkməkdir.
Xərçəng xəstəliyi ilə mübarizəyə həsr edilmiş bu beynəlxalq gün 2005-ci ildə Xərçəng Əleyhinə Beynəlxalq İttifaq tərəfindən təsis edilib.
Ümumdünya Səhiyyə Təşkilatı bu gün ilə əlaqədar yayımladığı məqalədə, xərçəng xəstəliyinin gətirdiyi ölümü azaltmağın mümkün olduğunu bildirib. Təşkilat hökumətlərə və digər əlaqədar qurumlara xərçəngin erkən diaqnozu və müalicəsi üçün lazımi addımların atmasına səsləyib.
Ümumdünya Səhiyyə Təşkilatının (ÜST) proqnozuna görə 2010-2020-ci illər ərzində qeyri-infeksion xəstəliklər, o cümlədən, ürək-damar xəstəlikləri və xərçəng xəstəlikləri ilə bağlı ölüm hallarının 15%-dək artması gözlənilir.
Məlumata əsasən, 2025-ci ilədək dünyada 20 milyon yeni xərçəng xəstəliyi qeydə alınacaqdır. Həmin halların 4/5 hissəsi Azərbaycanın da daxil olduğu aşağı və orta gəliri olan ölkələrdə baş verəcəyi bildirilir. Avropada 2012-ci ildə 4 milyon yeni xərçəng halı qeydə alınıbsa, 2030-cu ildə bu rəqəm ildə 5 milyona çatması gözlənilir.
Aygün SƏFƏRLİ, musavat.com