"Təfəkkür" Universitetinin bağlanmasını təhsil eksperti Kamran Əsədov şərh edib.
Ekspert hesab edir ki, bu universitetlərin təhsil sahəsində açdığı yaralar çətin ki uzun müddət unudulsun: "Son belə ağır zərbəni Azərbaycan Beynəlxalq Universiteti vurmuşdu. Ondan sonra insanların özəl ali təhsil müəssisələrinə inamı azalmışdı.
Daha sonra bağlanan universitetin tələbələri başqa özəl universitetlərə
köçürüldü. Bu siyahıya "Təfəkkür" Universiteti də daxil olur. Bu,
gözlənilən idi. 2016-ci ildə ali məktəblərə qəbul imtahanlarından sonra plan
yerlərinə yetərincə abituriyent toplaya bilməyən universitetin bağlanacağı
qaçılmaz idi.
Təsəvvür edin, "Odlar Yurdu" Universiteti 2016-cı ildə elan etdiyi
plan yerinin cəmi 11 faizinə tələbə qəbulu apara bildi, 89 faiz yer boş qaldı”.
Kamran Əsədov deyir ki, "Təfəkkür" Universitetinin aqibətini
Kooperasiya Universiteti də gözləyir: "Aparılan sorğulardan da məlum olur ki,
tələbələrin böyük əksəriyyətinin "Odlar Yurdu", "Təfəkkür"
və Kooperasiya universitetilərindəki smestr imtahanlarından böyük narazılığı
var. Bu ali təhsil müəssisələrində tələbələrin öz savadları ilə imtahanlarda
müsbət qiymətlər alması mümkün deyil. Amma xarici ölkələrdən tələbələrin böyük
hissəsinin bu universitetlərə köçürmə alması onları ayaqda saxlayan amillərdən
idi.
Bu ildən Azərbaycan ərazisində tələbə köçürülməsi vahid qaydada Təhsil
Nazirliyi tərəfindən həyata keçiriləcəyinə görə onlar bu gəlirdən də məhrum
oldular.
Dünyada ali təhsil müəssisələrinin gəlirinin böyük hissəsi onların ixtiraları,
bizdə ancaq tələbənin təhsilhaqqı hesabına formalaşır”.
Ekspert qeyd edib ki, hazırda Azərbaycanda 54 ali təhsil müəssisəsi fəaliyyət
göstərir. Bir neçə universitetin bağlanması ali təhsil sahəsinə o qədər də
böyük təsir göstərməyəcək: "Bu, digər universitetlərin rəqabət qabiliyyətinin
artırılmasına xidmət edəcək.
Özəl ali təhsil müəssisələrinin böyük əksəriyyəti ailə üzvlərinin idarə etdiyi
qəbiləni xatırladır. Rektordan tutmuş qapıçıya qədər hamısı qohumdur. Əlbəttə,
belə mühitdə təhsil inkişaf edə bilməz”.
İlhamə ƏBÜLFƏT, teleqraf.com
