Bu gün Müsavat Partiyası Divanının növbəti iclası keçirilib. Partiyanın mətbuat departamentindən "Basta”ya verilən məlumatda bildirilir ki, Divan üzvləri toplantının əvvəlində Xəzər dənizində həlak olan neftçilərin və Türkiyənin Kayseri şəhərində PKK-nın törətdiyi terror nəticəsində həyatını itirən şəhidlərin xatirəsini br dəqiqəlik  sükutla yad ediblər.

Gündəliyin görülən işlər və qərarların icrası  bölümündə Balakən rayon təşkilatında keçirilmiş hesabat-seçki yığıncağı və Müsavatçı Qadınlar Birliyinin illik hesabatı haqqında məlumat verilib.

Gündəliyin ictimai-siyasi vəziyyət bölümündə Müsavat AKM təşkilatının Almaniyanın Münster şəhərində siyasi məhbuslara azadlıq tələbi ilə keçirdiyi etiraz aksiyası haqqında fikir mübadiləsi aparılıb və yüksək dəyərləndirilərək aksiyanın təşkilatçılarına təşəkkür elan edilib.

Divan üzvü Tofiq Yaqublu Bolqarıstanın paytaxtı Sofiya şəhərində iştirak etdiyi ALDE-nin tədbiri haqqında Divan üzvlərini məlumatlandırıb.

Divan Avropa Stabillik Təşəbbüsü Təşkilatının apardığı araşdırmalar nəticəsində "kürü diplomatiyası”nda adı keçən, AŞ PA-nın Xalq Partiyası Qrupunun sədri italiyalı deputat Luka Volentyenin etirafları  haqqında  müzakirə aparıb. Məlum olub ki, həmin deputat Azərbaycan hakimiyyətindən iri məbləğdə rüşvət alaraq, AŞ PA-da Azərbaycandakı siyasi məhbuslar məsələsini blok etmək üçün lobbiçilik fəaliyyəti ilə məşğul olub. Müsavat Partiyası bu məsələ ilə bağlı Azərbaycan hakimiyyətindən izahat və ölkənin hüquq-mühafizə orqanlarından bu məsələni dərhal  araşdırmağı tələb edir.