Müsavatın Divan üzvü Nemət Kərimli AXCP sədrinin müavini Fuad Qəhrəmanlının vəkilidir. Təşkilatlar arasında münasibətlər nə qədər soyuq olsa da, bu, Nemət Kərimlinin "Nardaran işi” üzrə müdafiə etdiyi digər beş nəfərlə yanaşı, Fuad Qəhrəmanlının da hüquqlarını müdafiə etməsinə əngəl yaratmayıb.
Nemət Kərimlinin bu seçimi Müsavat Partiyasının rəhbərliyi tərəfindən də təqdir olunub. Partiya başqanı Arif Hacılı Müsavatın "Nardaran işi” üzrə təqsirləndirilən şəxsləri müdafiə etdiyini bildirib və deyib ki, "həm vəkillərimiz vasitəsilə, həm də özümüz onların azadlığa çıxması üçün mübarizə aparırıq”.
Amma görünür, qarşı tərəfin münasibəti adekvat deyil. Azadlıq.info saytı vəkil Nemət Kərimliyə senzura tətbiq edib. Nemət Kərimlinin Fuad Qəhrəmanlını müdafiə etməsi də sayt rəhbərliyini bu davranışdan daşındırmayıb.
Qeyd edək ki, Bakı Ağır Cinayətlər Məhkəməsində "Nardaran işi” üzrə 18 nəfərin, o cümlədən Fuad Qəhrəmanlını məhkəməsi gedir. Təqsirləndirilən şəxslərin hər biri vəkillə təmin olunsa da, onların bir çoxu hakimiyyətin qəzəbinə tuş gəlməmək üçün prosesdə iştirak etmir, yaxud passivlik göstərirlər. Məhkəmədə ən fəal müdafiəçilər sırasında Yalçın İmanov və Nemət Kərimlinin adı çəkilir. Bu səbəbdən hər ikisi təzyiqlə üzləşib. Onların məhkəmənin sonunda Vəkillər Kollegiyasından uzaqlaşdırılacağı da istisna deyil.
Təqdim etdiyimiz fotolarda "Nardaran işi” üzrə dekabrın 16-da dərc edilən reportajların bir hissəsi əks olunub. "Azadlıq.org” saytında dərc edilən yazı "Azadlıq.info” saytında olduğu kimi dərc edilsə də, burada Nemət Kərimlinin adı çıxarılaraq, "başqa bir müdafiəçi” kimi təqdim olunub.
***
Vəkil Nemət Kərimli bunun yenilik olmadığını, amma belə bir məsələyə əhəmiyyət vermədiyini bildirdi: "Sağolsunlar ki, məni təyinatlı vəkil, yaxud başqa adla təqdim etməyiblər, sadəcə, "başqa bir müdafiəçi” yazıblar.
"Azərbaycan saatı” verilişində də belə hallar olub. Məhkəmədəki çıxışım haqqında ətraflı məlumat verilsə də, məni "başqa bir müdafiəçi” kimi təqdim ediblər. Buna görə bir cəbhəçi dostum Qənimət Zahidə irad da bildirib və cavab alıb ki, sadəcə, adımı unudubmuş. Bir dəfə hətta Fuad Qəhrəmanlının günahsız olması barədə vəsatətimi dərc etmədilər. Halbuki bu vəsatətin "Azadlıq”ın saytında yerləşdirilməsini Fuad Qəhrəmanlı tövsiyə etmişdi və Zümrüd Yağmur vasitəsilə redaksiyaya təqdim olunmuşdu. Amma mən bunu problem saymıram. "Azadlıq” qəzetində də dostlarım var. Bir dəfə onlardan biri zarafatla mənə demişdi ki, müsavatçı olsan da, soyadın Kərimli olduğu üçün sənə hörmətimiz var”.
Məsələ ilə bağlı "Azadlıq”ın redaktoru Rahim Hacıyevə göndərdiyimiz suala hələlik cavab verilməyib.//bastainfo
