"YouTube” video xidməti Koreya Xalq Demokratik Respublikası dövlət televiziyasının kanalını bloklayıb.

İKT.lent.az-ın "The Washington Post”a istinadən verdiyi xəbərə görə, "YouTube” bu addımla ABŞ-ın Şimali Koreyaya qarşı tətbiq etdiyi sanksiyaları pozmaqdan özünü sığortalayıb. Kanal orada yayımlanan hansısa proqrama görə yox, Şimali Koreyanın bu kanal vasitəsilə reklam gəliri əldə edə biləcəyi ehtimalı ilə əlaqədar bağlanıb.

Qəzetin xəbərinə görə, "YouTube”un sahibi "Google” hələ noyabr ayında kanalı bağlayıb, lakin bu haqda hər hansı şərh verilməyib. "Biz ayrı-ayrı videolar və kanallar haqda şərh vermirik. Lakin biz qaydalarımızı və xidmət şərtlərimizi pozan, eləcə qanunazidd akkauntları söndürürük”, - deyə "Google”un Asiya nümayəndəliyindən bildirilib.

Qeyd edək ki, kanal Şimali Koreya dövlət televiziyasının xəbərlərini və digər təbliğat materiallarını yayımlayırdı. Kanalın bağlanması bu ölkədəki vəziyyəti öyrənən Qərb analitiklərini məyus edib.