Dövlət Toxum Müfəttişliyinin Göygöl rayon şöbəsinin rəisi Nəriman Ələkbərovla bağlı maraqlı iddia ortaya çıxıb.
Rayondan sahibkarların ünvanladığı müraciətdə bildirilir ki, Ələkbərov vəzifə səlahiyyətlərindən sui-istifadə edərək əkinçilərin toxumluq taxıllarını qeydiyyata almaq üçün "qiymət” müəyyənləşdirib. Bu "haqqı” verməyənlərə isə toxum üçün sertfikat verilmir.
Şikayətçilər bildiriblər ki, Nəriman Ələkbərov idarənin səlahiyyətlərindən sui-istifadə edərək özü və qohumlarına şərait yaradır:
"Belə ki, oğlu Yunus Ələkbərovun adına mənşəyi məlum olmayan baş soğan əkərək ondan toxumluq istehsal edib. Guya bu toxumu başa rayondan alıb, özü becərib və sortlaşdırıb. İndi də toxumluq kimi istifadəyə verir. Əslində, bununla da dövlətdən saxtalaşdırılmış sənədlərlə külli miqdarda subsidiya alıb.
Eyni zamanda, Gəncə-Samux yolu üzərində un dəyirmanında olan toxumluq üçün yararsız taxılları qeydə alıb və nazirlikdən gələn nümayəndələrə toxumluq kimi təqdim edib. Bu yolla da dövlətdən külli miqdarda subsidiya alaraq mənimsəyib. Bununla kifayətlənməyən Ələkbərov qardaşının əkin sahəsində istehsal etdikləri yemlik taxılları toxumluq kimi qeydə alıb. Amma digər sahibkarlara şərait yaratmır, onları süni şəkildə problemlərlə üz-üzə qoyur.
Nəriman Ələkbərov və qardaşı 1994-cü ildə dövlət çevrilişində cəhddə ittiham olunaraq həbs olunub”.
