"Üzücü oyun oldu. Uşaqlar yaxşı oynasalar da, adi diqqətsizliyə görə qapımızda qollar gördük”.
Musavat.com xəbər verir ki, bu sözləri "Qəbələ”nin məşqçisi Sənan Qurbanov deyib.
Avropa Liqasının qrup mərhələsi çərçivəsində "Anderlext”i qəbul edən "qırmızı-qaralar” meydandan 1:3 hesablı məğlubiyyətlə ayrılıblar.
Matçdan sonra mətbuat konfransı keçirən Qurbanov nəticəni belə şərh edib: "Oyundan öncə də məşqçimiz uşaqları məlumatlandırmışdı ki, rəqibin heyətində çox sürətli futbolçular var.
Komandamız yaxşı oynayıb, məğlub oldu. Ardıcıl 2 il Avroliqanın qrupunda çıxış etmək "Qəbələ” üçün yaxşı təcrübədir. Məncə, komandamız təcrübə yığa-yığa yaxşı yerə gəlib çıxacaq”.
- Məğlubiyyətin əsas səbəbkarları kimdir?
- Mən baş məşqçinin dediklərini icra edən adamam. Sadəcə onu əvəz edirdim. Məğlub olmaq həmişə pisdir. Oyunu analiz edib, çatışmazlıqları aradan qaldıracağıq.
- Oyundan əvvəl penaltini Rikardinyonun yerinə yetirilməsi nəzərdə tutulmuşdu?
- Matçdan əvvəl həm Rikardinyo, həm də Filip Ozobiçə bu tapşırıq verilmişdi. Penaltini əsasən psixoloji vəziyyəti üstün olan oyunçular istifadə edir. Rikardinyo özünə daha çox inandı. O, ilk 2 epizodda topu qapıdan keçirdi. Üçüncü penaltini qaçırması isə psixoloji amillə bağlı idi.
- Yenidən zədələnən Dabo "Qarabağ”a qarşı oynaya bilərmi?
- Həkimlər hələ konkret bir söz deməyiblər. Topuğunda ağrı var. Sabah MRT-dən sonra dəqiq biləcəyik.
Məhəmməd Türkmən, musavat.com
