Türkiyənin İŞİD-ə qarşı apardığı mübarizədə PKK-nın Suriya qolu YPG silahlılarının ələ keçirdiyi Mənbic şəhəri maneə olaraq qalır.
Avropa.info xəbər verir ki, regiondan gələn xəbərlərə görə Türkiyəyə məxsus təyyarələr üç gündür ki, Mənbicin qərbindəki mövqeləri vurur.
Dünən Ankarada çıxış edən prezident Rəcəb Tayyib Ərdoğan Türkiyənin bu məsələdə qətiyyətini bir daha ən yüksək səviyyədə dilə gətirib:
"Hazırda Əl Babın qapısındayıq. Əl Babı qərbdən mühasirəyə aldıq. Kifayət etməz, oradan da Mənbicə doğru gedəcəyik. Niyə Mənbicə gedəcəyik? Çox maraqlı olduğumuz üçün deyil. Mənbicdə PYD var YPG var. Onlar da oranı tərk etsin, şərqə çəkilsin. Bunu dedik. "Gedəcəklər” dedilər, "Getsin” dedik. Bu ana qədər bir hissəsinin getdiyini deyirlər. PYD və YPG-nin oranı tamamilə boşaltmasını istəyirik. Çünki o torpaqlar terror təşkilatlarının deyil, oralar ərəblərin torpaqları idi” – Ərdoğan belə deyib.
Ərdoğan türk ordusunun Raqqa əməliyyatında da iştirak etməyə hazır olduğunu bildirib:
"Gəlin, Rəqqaya da birlikdə müdaxilə edək. Rəqqaya müdaxilə etdiyimiz zaman da PYD, PYG ilə deyil – onların qoyun bir tərəfə, çünki onlar terror təşkilatı. Sənin nə işin var terror təşkilatı ilə? Türkiyə ilə koalisiya qüvvələri bu işi birlikdə görə bilmiriksə, oradakı 1500-2000 DAEŞ-çini çıxarıb ata bilmiriksə, vay halımıza. Necə dövlətlərik biz? İndi gözləyirik. Təmənna edirəm ki, bu məsələdə həmrəylik olar və Rəqqanı DAEŞ terror təşkilatından təmizləyərik. Bu addımı atarıq. Beləliklə cənub-şərqimizi terror təhlükəsindən təmizləyərik”.
Qeyd edək ki, Suriyanın Mənbic şəhəri PKK-nın Suriya qolu PYD/YPG-nin əlindədir. Şəhərdə ABŞ ordusunun hərbi bazasının yerləşdiyi deyilir. ABŞ xüsusi təyinatlıları terrorçulara silahlı dəstək verir.
