Erməni publisisti, Mühacir Yazıçılar Birliyinin həmtəsisçisi Vahe Avetyan növbəti dəfə Bakıya gəlib.
Bu İsveçdə yaşayan siyasi mühacir və Sərkisyan rejiminin tənqidçisi olan V.Avetyanın Bakıya ilk səfəri deyil. Daha öncə erməni publisist Bakıya gəlsə də vizası olmadığı üçün buraxılmamışdı. O isə mətbuata müsahibəsində Xocalı qurbanlarının abidəsinə gül qoymaq arzusunun olduğunu da bildirmişdi. Avetyan ikinci cəhdində ölkəyə girişə nail ola bilib. Ona bir neçə günlük Bakı şəhərində qonaq olmağa icazə verilib. Hazırda erməni hüquq müdafiəçisi Bakı şəhərindədir və paytaxtın görməli yerləri ilə tanış olur. Avetyan Xocalı soyqırımına görə Azərbaycandan üzr istəyən ilk ermənilərdəndir.
Maraqlıdır , bəs görəsən bu hadisəyə Azərbaycan xalqının münasibəti necədir? Onlar İsveç vətəndaşı olan erməni publisisti Bakı küçələrində görsələr, reaksiyaları necə olacaq?
Musavat.com olaraq bu suala cavab tapmaq üçün, eyni sualla paytaxt sakinləri arasında sorğu keçirdik.
Cavablar isə birmənalı olmadı. Belə ki, sorğu iştirakçıları olan gənclər bunu normal qəbul edəcəklərini bildirsələr də, yaşlı insanlar bir erməninin ayağının Bakıya dəyməsini qəbul etmədiklərini qeyd etdilər.
Daha ətraflı təqdim etdiyimiz videosorğudan izləyə biləriniz.
Məğrur Mərd, musavat.com
