Elman Fəttah: "Tələm-tələsik məhkəmə keçirilərək, ərizəsinin rədd edilməsi haqda qərar verilib”
Dekabrın 8-də həbsdəki Müsavat başqanının müavini Yadigar Sadıqovun cəzasının çəkilməmiş hissəsinin başqa cəza ilə əvəz olunması barədə müraciətinə baxılıb. Qaradağ Rayon Məhkəməsində keçirilən prosesdə vicdan məhbusunun müraciəti təmin olunmayıb. Bu barədə müsavat.com-a Yadigar Sadıqovun Hüquqlarını Müdafiə Komitəsinin sədri Elman Fəttah məlumat verib: "Dekabrın 8-də Yadigar bəyin məhkəməsi oldu. O, noyabr ayında cəzasının çəkilməmiş hissəsinin başqa cəza növü ilə əvəz edilməsi haqda Qaradağ Rayon Məhkəməsinə ərizə vermişdi. Məhkəmə dekabr ayının 4-nə təyin olunsa da, anidən və izah edilmədən təxirə salınmışdı. Yenə də xəbər verilmədən tələm-tələsik məhkəmə keçirilərək, ərizəsinin rədd edilməsi haqda qərar verilib”.
Xatırladaq ki, Y.Sadıqov 2013-cü il iyunun 27-də Lənkəran sakini Rəşid Kərimovun şikayəti əsasında şübhəli şəxs kimi həbs edilib. O, Cinayət Məcəlləsinin 221.3 (silah və ya silah kimi istifadə edilən predmetdən istifadə ilə xuliqanlıq) maddəsi ilə cinayət işi açılıb. Məhkəmə hökmü ilə başqan müavini 6 il müddətinə azadlıqdan məhrum edilsə də, növbəti instansiya məhkəmələri onun həbs cəzasını 3 il yarıma qədər endiriblər.
