Nəsimi Rayon Məhkəməsi Fuad Qəhrəmanlı barədə 3 ay müddətinə həbs-qətimkan tədbiri seçilməsi barədə qərar qəbul edib.
Modern.az saytı xəbər verir ki, bu barədə Fuad Qəhrəmanlının vəkili Fəxrəddin Mehdiyev məlumat verib.
F.Qəhrəmanlı Cinayət Məcəlləsinin bu maddələri ilə ittiham olunur:
281.1. Hakimiyyətin zorla ələ keçirilməsinə, zorla saxlanılmasına və ya Azərbaycan Respublikasının konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlar etmə, habelə bu cür məzmunlu materialları yayma. Beş ilədək müddətə azadlıqdan məhrum etmə ilə cəzalandırılır.
283.1. Milli, irqi, sosial və ya dini düşmənçiliyin salınmasına, milli ləyaqətin alçaldılmasına, habelə milli, irqi, sosial və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlər, aşkar surətdə və ya kütləvi informasiya vasitələrindən istifadə olunmaqla törədildikdə;
283.2.1. Eyni əməllər zor tətbiq etməklə və ya zor tətbiq etmə hədəsi ilə törədildikdə.
Üç ildən beş ilədək müddətə azadlıqdan məhrum etmə ilə cəzalandırılır.
Həbsə alındıqdan sonra Fuad Qəhrəmanlının yaşadığı mənzildə axtarış aparılıb.
Qeyd edək ki, Azərbaycan Xalq Cəbhəsi Partiyası sədrinin müavini Fuad Qəhrəmanlı saxlanılaraq Baş Prokurorluğun Ağır Cinayətlərə Dair İşlər Üzrə İstintaq İdarəsinə aparılıb.