Şəki Apelyasiya məhkəməsi Müsavat başqanının müavini Tofiq Yaqublu və Real Vətəndaş Hərakatının sədri İlqar Məmmədovun şikayəti üzrə prosesi fevral ayının 25-nə təyin edib.

Bu haqda "Basta"ya məlumat verən vəkil Nemət Kərimli məhkəmənin bu qədər yubadılmasının Cinayət Prosessual Məcəlləyə zidd olduğunu bildirib:

"Məcəlləyə görə 30 gün ərzində şikayətin araşdırılmasına başlanmalıdır. Müstəsna hallarda bu müddət 45 gün ola bilər. Amma Tofiq Yaqublu ilə İlqar Məmmədovun işində hər hansı müstəsna hal yoxdur. Hətta 45 gün müddətini əsas götürsəydilər belə, məhkəmə yanvar ayının ortalarında başlamalı idi. Məhkəmənin fevralın 25-nə təyin olunması Cinayət Prosessual Məcəlləsinə ziddir".

Nemət Kərimli bu qanunsuzla bağlı şikayət verəcəyini bildirib.

Qeyd edək ki, bu şikayət Şəki Apelyasiya Məhkəməsinə Ali Məhkəmədən qaytarılıb. Ali Məhkəmə şikayət üzrə bundan əvvəl Şəki Apellyasiya Məhkəməsinin çıxardığı qərar ləğv edərək, işi yenidən Şəki Apellyasiya məhkəməsinə qaytarmışdı.

Nemət Kərimlinin fikrincə, "istər Ali Məhkəmə, istərsə də Şəki Apelyasiya Məhkəməsi bu qanunsuz qərarlar vasitəsilə vaxtı uzatmaq, Avropa Məhkəməsinə şikayətin verilməsini yubatmaq istəyirlər".(bastainfo.com)

ULUYOL.İNFO