2018-ci il Dünya Futbol Çempionatının Asiya üzrə seçmə mərhələsi çərçivəsində İran İslam Respublikası və Koreya Respublikası milli komandaları oktyabrın 11-də Tehranın Azadi arenasında qarşılaşıb.
Hedef14.org-un İRİB-ə istinadən verdiyi xəbərə görə, "Ya Hüseyn! Ya Əba Əbdillah!" və digər Aşura ilə bağlı şuarlarla başlayan oyunun sonuna qədər belə atmosfer davam edib.
Fasilədə isə meydançanın mərkəzinə çıxan mərsiyəxan Kərbəla vaqeəsi haqda rövzə və mərsiyə oxuyub. Tamaşaçılar da onun səsinə səs verib.
Beləliklə İran rəsmilərinin daha öncə vəd etdikləri kimi, Azadi arena dünyanın ən böyük hüseyniyyəsinə çevrilib.
Matça gəldikdə isə, İranın üstünlüyü ilə keçən oyunda ev sahibləri 25-ci dəqiqədə Sərdar Əzmounun vurduğu qolla 1-0 hesabı ilə qalib gəlib.
Beləliklə İran millisi Koreyanı 3 xal üstələyərək qrupda 10 xalla vahid lider olub.