"Ana südü körpələr üçün ən ideal qidadır. Ona görə də ölkədə ana südü ilə qidalanma faizinin artırılması vacibdir".
"Report" xəbər verir ki, bunu Səhiyyə Nazirliyi Elmi-Tədqiqat Pediatriya İnstitutunun direktoru, ölkənin baş pediatrı Nəsib Quliyev "Körpələrin qidalanmasında ana südünün əhəmiyyəti” mövzusunda keçirilən mətbuat konfransında deyib.
Onun sözlərinə görə, təəssüfedici haldır ki, dünyanın bir çox ölkələrində, o cümlədən Azərbaycanda uşaqların ana südü ilə qidalandırılmasının səviyyəsi arzuolunan səviyyədə deyil: "Statistik məlumatlara görə, 1992-ci ildə 1 yaşa qədər 25%-ə qədər ana öz körpəsini süd verib. Döş ilə əmizdirmədə mövcud problemləri araşdırmaq, onları aradan qaldırmaq, bütövlükdə döşlə əmizdirmənin mühafizəsi, təbliği istiqamətində UNİCEF və Səhiyyə Nazirliyinin apardığı məqsədyönlü tədbirlər nəticəsində son illərdə bu rəqəm 50%-ə qədər yüksəlib. Əlbəttə, bu hələ arzuolunan hədd deyil. Ana südü ilə qidalanan uşaqların sayını artırmaq yalnız tibb işçilərinin, xüsusən pediatrların fəaliyyətindən asılı deyil. Bu sahədə uğur əldə etmək üçün bütövlükdə ictimaiyyətin ana südü ilə qidalanmaya baxışı, mövqeyi dəyişməlidir".
O vurğulayıb ki, ana südü uşaqların sağlamlığını ən yüksək səviyyədə təmin edir və xarici mühitin xoşagəlməz təsirlərinə qarşı orqanizmin davamlığını artırır.
Həkim qeyd edib ki, döşlə əmizdirmə, həmçinin ananın sağlamlığına da müsbət təsir göstərir: "Belə ki, doğuşdan sonrakı qanaxmaların, anemiyanın yaranma ehtimalını azaldır, süd vəziləri və yumurtalıqları müxtəlif şişlərdən qoruyur, ilk 6 ay ərzində növbəti hamiləlik riskini azaldır. Ana südü ilə qidalanmaya mane olan əsas səbəblərin 998-99%-i subyektiv (ana südünün çatışmazlığı), 1-2%-i isə obyektiv səbəblər (hipoqalaktiya) təşkil edir".
N.Quliyev qeyd edib ki, dövlət, səhiyyə işçiləri, cəmiyyətin bütün nümayəndələrinin birgə, müştərək məqsədyönlü, pozitiv fəaliyyəti sayəsində ölkədə döşlə əmizdirmənin miqyasını maksimum arzuolunan həddə - 90-95%-ə çatdırmaq mümkündür: "Çünki ana südü ilə qidalanmanın hər bir ailənin öz körpəsinə qayğısı kimi qiymətləndirmək düzgün deyil, əslində bu, bütün cəmiyyətin qayğısıdır".
