Nərimanov Rayon Məhkəməsi jurnalist Fikrət Fərəməzoğlunu ev dustaqlığına buraxmayıb.
Bu haqda «Turan» İnformasiya Agentliyinə onun vəkili Elçin Sadıqov məlumat verib.
Vəkilin deməsinə görə, Nərimanov Rayon Məhkəməsinin hakimi Vüsal Qəmbərov onların vəsatətini təmin etməyib.
Jurnalistin müdafiəçiləri hesab edirdilər ki, F.Fərəməzoğlunun ev dustaqlığına buraxılması onun barəsində açılan cinayət işinin araşdırmasına hər hansı mənfi təsir göstərməyəcək. Ona görə də həbs qətimkan tədbirinin ev dustaqlığı ilə əvəz edilməsini istəyirdilər.
Məhkəmə bu arqumentləri qəbul etməyib.
Jam.az saytının baş redaktoru F.Fərəməzoğlu 2016-cı il iyunun 30-da saxlanıb. Ona qarşı Cinayət Məcəlləsinin 182-ci (hədə-qorxu ilə rüşvət tələb etmə) maddəsinin müxtəlif bəndləri ilə ittiham irəli sürülüb.
Daxili İşlər Nazirliyi (DİN) iddia edir ki, jurnalist iyunun 30-da bir sahibkardan 3000 manat alarkən saxlanıb.
DİN həmçinin, bəyan edib ki, F.Fərəməzoğlu bir qrup şəxslə birgə çoxsaylı sahibkar və vəzifəli şəxs barəsində rüsvayedici məlumatlar yaymaq hədəsi ilə onlardan külli miqdarda pul alıb.
Nərimanov Rayon Məhkəməsi iyulun 2-də F.Fərəməzoğlu barəsində 3 aylıq həbs qərarı verib. O, tutulandan az sonra vəkildən imtina etmişdi.
Ancaq bir müddət sonra F.Fərəməzoğlu yenidən vəkil xidmətindən istifadə etməyə başlayıb. Jurnalistin yeni vəkili Elçin Sadıqov bir neçə gün öncə ittihamlarla razılaşmadıqlarını bildirmişdi.
Jam.az saytının baş redaktoru F.Fərəməzoğlu 10 il öncə də cinayət məsuliyyətinə cəlb olunub. O zaman «24 saat» qəzetinin baş redaktoru olan F.Fərəməzoğlu daxili işlər naziri Ramil Usubovun şərəf və ləyaqətin qorunmasına dair iddiası üzrə məhkəməyə çəkilmişdi. Məhkəmə jurnalisti şərti olaraq 1 il müddətinə azadlıqdan məhrum etmişdi.
