Dekabrın 1-də gecə saatlarında "Azadxeber.az” saytının redaktor əvəzi İlkin Məmmədli yaşadığı Sabunçu rayonu, Bakıxanov qəsəbəsindən naməlum şəxslər tərəfindən aparılıb. JAM.AZ xəbər verir ki, bu barədə onun yaxınları məlumat yayıb.
Onların dediyinə görə, jurnalist bazarlıq edib evə gəlirmiş: "Mağazaya düşdü, gözlədik, gəlmədi. Aldığı ərzaqlar həyətin ortasında idi. Öyrəndik ki, həyətdə zorla maşına mindirilərək aparılıb. Kimin hara apardığını bilmirik. Güman edirik ki, polislər aparıb”.
Məlumata görə, hazırda İlkin Məmmədlinin atası ərazidəki polis bölməsinə müraciət etməyə gedib.
Sabunçu rayon Polis İdarəsindən İlkin Məmmədlinin atasına oğlunun saxlanıldığını təsdiqləyiblər. Bildirilib ki, o, öncə idarəyə gətirilib, sonra isə şəhərə aparılıb. Hara aparıldığı deyilməyib. Ancaq onun Baş Mütəşəkkil Cinayətkarlıqla Mübarizə İdarəsimə aparıldığı güman edilir.
Azadxeber.az saytı əsasən dini mövzular işıqlandırır. Azadxeber.az saytının baş redaktoru Nicat Əliyev hazırda həbsdədir. Beynəlxalq təşkilatlar tərəfindən siyasi məhbus kimi tanınır.
