Ali Hərbi Şuraya təqdim olunmasına rəğmən ordu generalı rütbəsinə yüksəldilməyən Türkiyə Hava Hücumundan Müdafiə Qoşunlarının komandanı, general-polkovnik Mehmet Şanver istifa verib. APA TV-nin məlumatına görə, mətbuata açıqlama verən general bildirib ki, bəzən insanlar tutduqları vəzifədən vaxtında getməyi bacarmalıdır: "Mən də buna nümunə olmaq istədim". Mehmet Şanver rütbə artımı təqdimatlarında adının həmişə birinci olduğunu xatırladıb: "Bu günə kimi podpolkovnik rütbəsindən general-polkovnik rütbəsinə kimi bütün təqdimatlarda adım birinci yerdə olub. Həyatımda heç vaxt ikinci olmamışam".
Xatırladaq ki, ordu generalı hərbi rütbəsi almaq üçün Ali Hərbi Şuraya təqdim olunan siyahıda Mehmet Şanverin adı birinci yerdə olub, amma Şura onun rütbəsini artırmaqdan imtina edib. Şanver general-polkovnik rütbəsi ilə Hərbi Akademiyalar Komandanlığına rəhbər təyin olunub, bu təyinatdan bir gün sonra həmin komandanlıq ləğv edilib.
Xatırladaq ki, silahlı çevrilişə cəhd zamanı Türkiyə Ordusunun 30-a yaxın generalı məhz Mehmet Şanverin qızının toyunda girov götürülmüşdü.