Sentyabrın 26-na təyin olunan referenduma münasibət bildirən müxalif qüvvələrin əksəriyəti Konstitusiyaya təklif edilən əlavə və düzəlişlərin ölkədə monarxiya rejiminin möhkəmlənməsinə yönəldiyi bəyan ediblər.
Müsavat Partiyası, AXCP, Real, MSDM və Nida Vətəndaş Hərəkatları ilə yanaşı, KXCP, Ümid Partiyası, D 18 təşkilatı da səsverməyə çıxarılan referendum aktının qəbul olunmasına qarşı olduqlarını bildiriblər.
Seçki Məcəlləsi siyasi partiyalara və vətəndaşlara ölkədə keçirilən referendumla bağlı təbliğat və ya anti-təbliğat aparmaq üçün təşviqat qrupu yaratmaq hüququ verir. Bəs müxalifət hakimiyyətin Konstitusiyanı yenidən dəyişdirmək istəyinin qarşısını almaq üçün hansı addımları atacaq?
Xəbər verdiyimiz kimi, Müsavat Partiyasının dünən keçirdiyi toplantısında referendumla bağlı təşəbbüs qrupunun yaradılması haqqında qərar qəbul olunub. Müsavat başqanının müavini Elman Fəttah bildirib ki, Konstitusiyanın daha da mürtəceləşdirilməsinin qarşısını almaq üçün Müsavat Partiyası bütün müstəvilərdə mübarizə aparacaq. "O cümlədən referndum üzrə təşəbbüs qrupu yaradaraq, hüquqi müstəvidə aktiv mübarizə aparmaq əzmindəyik”, – Elman Fəttah bildirib.
REAL Vətəndaş Hərəkatının rəhbərliyi də ayrıca təşviqat qrupu yaratmaq niyyətindədir.
MSDM referendum təşəbbüsünə demokratik qüvvələrin ilk reaksiyalarını və ictimai-siyasi qurumlar arasında məsləhətləşmələrin başlanmasını müsbət qiymətləndirərək, bu prosesə dəstək verməyə, cümhuriyyət dəyərlərini qorumaq uğrunda mübarizədə bilavasitə iştirak etməyə hazır olduğunu bəyan edib.
NİDA Vətəndaş Hərəkatı təşviqat qrupu yaratmasa da, belə qrup yaradan təşkilatlara dəstək verəcəyi ehtimal olunur. D 18 təşkilatının da təqribən bu mövqedə olduğu bildirilir.
Ümid Partiyasının sədri İqbal Ağazadə bildirib ki, müxalifətin antireferendum təşviqat qrupu yaratması müzakirə olunur. Hələlik dəqiq nəticə yoxdur.
AXCP təşviqat qrupu yaratmır. Milli Şura bəyanat verərək xalqı referenduma etiraz etməyə çağırıb.
Bəs müxalifət Konstitusiyanın dəyişdirilməsinə qarşı birgə mübarizə aparacaqmı?
Müsavat başqanı Arif Hacılı dünən partiyada keçirilən növbədənkənar toplantıda bildirib ki, siyasi təşkilatlarla bu istiqamətdə intensiv danışıqlar aparılır. Arif Hacılı AXCP, REAL, NİDA, D18 və digər təşkilatlarının rəhbərləri ilə görüşdüyünü bildirib. Onun sözlərindən məlum olur ki, hələlik vahid təşəbbüs qrupu və əməkdaşkıq mərkəzinin yaradılması mümkün olmayıb.
Arif Hacılı bildirib ki, müxalifətin referendumla bağlı mümkün olan ən geniş əməkdaşlıq mərkəzinin yaradılması istiqamətində səylər davam edir.
bastainfo.com
