Axar.az Güney Azərbaycan Milli Azadlıq Cəbhəsinə istinadən xəbər verir ki, iyulun 26-da keçirilən aksiyalarda onlarla etirazçı təhlükəsizlik qüvvələri tərəfindən yaxalanıb. Son məlumata görə, hələlik tutulan şəxslərdən yalnız ikisinin kimliyi müəyyənləşdirilib. Urmiyədə Huşəng Nəqilu və Təbrizdə Rüqəyyə Əlizadə təhlükəsizlik qüvvələri tərəfindən yaxalanaraq naməlum istiqamətə aparılıb.

Aksiyalarda "Haray, haray, mən türkəm”, "Azərbaycan milləti – Çəkməz bu zilləti” və s. kimi şüarlar səsləndirilib.

Xüsusi mənbələrdən əldə olunan informasiyalara görə, azərbaycanlı fəallar iyulun 28-də (mordadın 7-də) növbəti dəfə etiraz aksiyası keçirməyi planlaşdırır.

Xatırladaq ki, "Tərh-i No” qəzeti  iyulun 20-də Firdovsinin "Şahnamə” əsərindən bir hekayə nəşr edərək türkləri bədbəxt, irqi pis və s. kimi adlarla təqdim edib. Müəllif türklərlə yanaşı, qadınlara da hörmətsizlik göstərib. "Ey tanınmaz və bədbəxt türk, iranlı pəhləvanların qüdrətindən xəbərin varmı?! Biz turanlıları kişi kimi tanımırıq, onlar hamısı qadındırlar. Ey irqi pis olan türk, sən kişilərlə savaşmaq üçün yaranmayıbsan, get, qadınlar kimi əlinə pambıq və mil götür”, - qəzetdə dərc olunan yazının bir hissəsində qeyd olunub.