İyulun 15-dən 16-na keçən gecə Türkiyədə baş verən hərbi çevriliş cəhdi Müsavat Partiyası Divanının şənbə günü növbədənkənar toplantısında geniş müzakirə olunub.

İnsanların həlak olmasına səbəb olan, Türkiyə Cümhuriyyətinin çıxarlarına ciddi zərbə vuran bu hadisələrlə bağlı  xəbərlər dərin məyusluq ifadə edilib.

Müsavat Partiyasının Divanı legitim siyasi hakimiyyətlərə qarşı törədilən bütün hərbi çevrilişləri, o cümlədən dünən Türkiyədə Silahlı Qüvvələrin bir hissəsi tərəfindən baş verən çevriliş cəhdini siyasi hakimiyyətin əvəzlənməsi üçün qəbuledilməz üsul kimi pisləyib.

Müsavat Partiyası qardaş türk xalqının bu sınaqdan da uğurla çıxacağına, çevriliş cəhdinin törətdiyi fəsadların Türkiyə Cümhuriyyətinin istiqlalının qarantı olan orduya qarşı çevrilməyəcəyinə, əsası Atatürk tərəfindən qoyulmuş cümhuriyyət dəyərlərinə, dünyəvi, hüquqi, demokratik Türkiyə Cümhuriyyətini qorumağa və inkişaf etdirməyə nail olacağına inamını bildirib.