Dünya liderləri bu gecə Türkiyədə baş verən çevriliş cəhdi ilə əlaqədar bəyanat yayıblar.
Dövlət katibi Con Kerri ilə telefon əlaqəsi yaradan ABŞ prezidenti Barak Obama Türkiyənin demokratik yollarla seçilmiş prezidentinin dəstəklənməli olduğunu bəyan edib.
Bu barədə Ağ Evin Türkiyədə son hadisələrlə bağlı bəyanatında qeyd edilib.
Bəyanatda həmçinin prezident və baş katibin tərəflərin hər növ zorakılıqdan və qan tökülməsindən yayınmalı olduğu barədə də razılığa gəldiyi qeyd edilir.
BMT baş katibi Ban Ki-Mun tərəfləri Türkiyədə təmkinli olmağa çağırıb.
Baş katibin adından yayılan bəyanatda BMT-nin Türkiyədə çevriliş cəhdindən xəbərdar olduğu və qurumun hadisələri yerində aydınlaşdırmaq niyyəti yer alıb.
Federika Mogerini
Avropa İttifaqının xarici siyasət və təhlükəsizlik məsələləri üzrə ali komissarı Federika Mogerini də Türkiyədə baş verən son hadisələrlə əlaqədar tərəfləri "təmkinlilik nümayiş etdirməyə və demokratik təsisatlara hörmət etməyə” çağırıb.
İran xarici işlər naziri Məhəmməd Cavad Zərif Türkiyədə baş vermiş hərbi çevriliş cəhdini pisləyib.
XİN başçısı "Twitter” hesabında region ölkələrində hərbi çevrilişlərə yer olmadığını yazıb.
"Türk xalqının demokratiya və qanuni şəkildə seçilən hökuməti qətiyyətlə müdafiə etməsi hərbi çevrilişin uğursuzluğa məhkum olduğunu sübut etdi”, – deyə M.C.Zərif qeyd edib.
"Türkiyə bizim üçün vacib dost, tərəfdaş ölkədir. Türkiyənin demokratik inkişafı bizim üçün çox vacibdir”.
Bu bəyanatla Gürcüstanın baş naziri Georgi Kvirikaşvili Milli Təhlükəsizlik Şurasının iyulun 16-da gecə saatlarında keçirdiyi iclasında deyib.
Baş nazir bildirib ki, Türkiyə Gürcüstan üçün strateji tərəfdaşdır və bu ölkədə sabitliyin qorunması rəsmi Tbilisi üçün çox vacibdir.
Hərbi çevrilişin bütün demokratik ölkələr üçün yolverilməz olduğunu vurğulayan G.Kvirikaşvili, Türkiyədə baş verən hadisələrlə əlaqədar Gürcüstanın müvafiq strukturlarının məlumatlandırıldığını bildirib.
Rusya xarici işlər naziri Sergey Lavrov isə vurğulayıb ki, Türkiyədəki hadisələri diqqətlə izləyirlər:
"İstənilən ölümlərə səbəb olan qarşıdurmalardan uzaq durmalı və bütün problemlərin konstitusiya çərçivəsində həll olunması lazımdır”.
(azadliq.info)