Vüqar Nağıyev sahibkarları və vətəndaşları incitməyi ona İsmayıl Vəliyevin tapşırdığını bildirir.
Bir neçə il əvvəl, daha dəqiq desək, 2013-cü ildə Neftçala şəhərinin baş memarı Rüstəm Tahirovun barəsində Cinayət Məcəlləsinin 311.3-cü (rüşvət alma), 309.1-ci (vəzifə səlahiyyətlərini aşma) və 178.3-cü (dələduzluq) maddələri ilə cinayət işi açılmışdı. Baş memarın barəsində başlanmış cinayət işi baxılması üçün Lənkəran Ağır Cinayətlər Məhkəməsinə göndərilib.
Qeyd edək ki, R.Tahirov barəsində cinayət işi bir neçə sahibkarın şikayəti əsasında başlanıb. Belə ki, o rayonda sahibkarlıqla məşğul olan şəxslərə məxsus ticarət obyektlərinin sökülməsinə göstəriş verib. Obyektlərinin sökülməməsi müqabilində onlardan pul tələb edildiyi üçün həmin sahibkarlar şəhərin baş memarından prokurorluğa şikayət ediblər. Sahibkarın şikayəti araşdırılıb və fakta hüquqi qiymət verilib. Rüstəm Tahirov barəsində cinayət işi başlanmaqla yanaşı, o tutduğu vəzifədən də uzaqlaşdırılıb.
Nəzərinizə çatdırmaq istəyirik ki, rayonun hazırkı baş memarı isə Vüqar Nağıyevdir. Neftçaladakı mənbələrdən gundelik-baku.com-a verilən məlumatlara görə, hazırkı memar heç də Rüstəm Tahirovdan geri qalmır: «Təxminən 3 ildir bu vəzifədə işləyən Vüqar müəllim sahibkarların qorxulu röyasına çevrilib. O sənədlərində xırda problem olan ticarət obyektlərinin sahiblərini incitməklə məşğuldur. Deyir ki, filan qədər gətirməsəniz, obyektiniz söküləcək. Bəzi iş adamlarının baş memarın tələblərini qarşılamağa imkanı yoxdur. Bu səbəbdən onlar çıxılmaz vəziyyətdə qalıblar.
Digər tərəfdən, Neftçala rayonu ərazisində ictimai-iaşə obyekti və fərdi yaşayış sahəsi tikmək istəyənlərə də rayonun baş memarı tərəfindən süni əngəl yaradılır. Vüqar Nağıyev sənədləri qaydasında olan vətəndaşlardan «şirinlik» tələb edir. Əks təqdirdə tikinti işlərinin aparılmasına imkan vermir». Mənbəmiz deyir ki, baş memar törətdiyi bütün qanunsuz işlərdə icra başçısı İsmayıl Vəliyevin adını çəkir. Bildirir ki, icra başçısı belə tapşırıb. Deyilənə görə, Vüqar Nağıyev Neftçalanın baş memarı təyin olunandan sonra il işi avtomobilini dəyişmək olub. Həmçinin rayon ərazisində bir neçə ticarət obyektinə sahiblənib. Bu barədə yaxın günlərdə şok faktları açıqlayacağıq.
Bizi izləyin.
Qarşı tərəfə də cavab haqqı tanıyırıq.
