Keçmiş müstəntiq, siyasi bəyanatla tutduğu vəzifədən istefa verən, bundan sonra prokurorluq orqanlarından xaric edilib repressiyaya məruz qalan, hazırda ev dustaqlığında olan Rüfət Səfərov yenidən istintaqa çağırılıb. Bu barədə o feysbukda məlumat paylaşıb.
"Az öncə Baş prokurorun yanında Korrupsiyaya qarşı Mübarizə Baş İdarəsinin mühüm işlər üzrə müstəntiqi Rəşad Bəşirov bu gün saat 17-00-da istintaqa dəvət etdi. Yeddi aydır ki, ibtidai istintaq davam edir. Əsassız surətdə ibtidai istintaqın, alternativ qətimkan tədbiri olaraq ev dustaqlığının müddət uzadılır, hərçənd ki, faktiki olaraq heç bir istintaq hərəkəti aparılmır. Bu, məni narahat etmir, çünki ciddi və açıq addımı atmamışdan qabaq yaxın, orta və uzaq perspektivdə nələrin gözlədiyini hesablamışdım. Yeganə narahatçılığım ondan ibarətdir ki, mənə görə xəstə ailə üzvlərim, xüsusilə, 82 yaşlı sevgili nənəm repressiya maşınının təkərləri altında haldan-hala düşür. Hər şeyə rəğmən fikir və görüşlərimdə qərarlıyam!”, – deyə keçmiş müstəntiq yazıb.