Avropa Şurası Parlament Assambleyasının Monitorinq Komitəsinin Bakıda səfərdə olan həmməruzəçiləri Sezar Florin Preda və Stefan Şennak bu gün müxalifət təmsilçiləri ilə görüşüblər.
Görüşdə Müsavat başqanı Arif Hacılı, AXCP sədri Əli Kərimli, Milli Şuranın sədri Cəmil Həsənli və Liberal partiyanın təmsilçisi qismində Əvəz Temirxan iştirak ediblər.
Görüşdə Azərbaycanda insan haqlarının durumu, siyasi məhbuslar, Qarabağ münaqişəsi və digər məsələlər müzakirə olunub.
Həmməruzəçilər bu gün həmçinin yenicə həbsdən çıxmış siyasi məhbusların bir qrupu ilə görüşüblər. Bu haqda "Basta”ya Müsavat başqanının müavini Yadigar Sadıqov məlumat verib.
Bu görüşdə keçmiş vicdan məhbuslarından Yadigar Sadıqov, Hilal Məmmədov, Rəşad Həsənov, Sirac Kərimli, Rəsul Cəfərov və İntiqam Əliyev iştirak ediblər.
Yadigar Sadıqov müzakirələrdə özünün aşağıdakı dörd məsələyə toxunduğunu bildirib:
– dini görüşlərinə görə həbs olunanlar;
– cəzaçəkmə müəssisələrindəki şərait;
– vicdan məhbuslarının şikayətinə Avropa məhkəməsində daha tez baxılması;
– Azərbaycanda yaşayan qeyri-türk xalqların dilində AzTV və ya ITV-da verilişlərin hazırlanması.
Qeyd edək ki, Avropa Şurasının həmməruzəçiləri bundan öncə ölkə başçısı İlham Əliyevlə, eləcə də yerli hüquq-müdafiəçilərinin bir qrupu ilə görüşüblər.
Mustafa Hacıbəyli, Bastainfo.com