Partiyanın mətbuat xidmətindən "Basta”ya verilən məlumata görə, iclasda görülən işlər və qərarların icrası barədə Divan üzvü Razim Əmiraslanlının məlumatı dinlənilib.

Müsavat Partiyası başqanının müavini Tofiq Yaqublu ABŞ səfirinin iğamətgahında keçirilən tədbirdə iştirakı haqqında Divana məlumat verib.

Müsavat Partiyasının Məclisinin sədri Nüşabə Sadıxlı Məclisin komissiyalarının tədbirlər planlaşdırdığını bildirib. Divan məsələni müzakirə edərək komissiyaların keçirəcəyi tədbirlərin qrafikini müəyyən edib. İlk olaraq Məclisin Təhsil Komissiyasının tədbirinin iyunun 18-də keçirilməsi qərarlaşdırılıb.

Divan Avropada yaşayan mühacir müsavatçıların təsis etdiyi Koordinasiya Mərkəzinin Almaniyada rəsmi qeydə alınması haqqında məlumatı təqdir edərək, mühacir müsavatçıların bir təşkilatda birləşməsinin fəaliyyətlərinin daha da səmərəli olması baxımından mühüm hadisə kimi qiymətləndirib.

Divan ölkədə və dünyada baş verən ictimai-siyasi hadisələri geniş müzakirə edib. "Qanun” nəşrlər evinə polis tərəfindən basqın edilərək, "REAL” Vətəndaş Hərəkatının sədri İlqar Məmmədov haqqında hazırlanan çap materiallarının müsadirə olunmasını, hazırda həbsdə olan hərəkat sədrinə qarşı sistemli xarakter alan siyasi basqıların davamı hesab edib və qətiyyətlə pisləyib.

Divan "Meydan TV” saytının əməkdaşları – Həbib Müntəzir və Orxan Məmmədin yaxınlarına qarşı təzyiqlərin, həmçinin "Azadlıq” qəzetinin baş redaktoru Qənimət Zahidin yaxınları haqqında verilən məhkəmə qərarını azad sözə qarşı rejimin tətbiq etdiyi "ailə repressiyası” siyasətinin yenidən vüsət alması kimi qiymətləndirib. Divan hakimiyyətdən bu təzyiqlərə dərhal son qoyulmasını tələb edib.

Müsavat Partiyası Məclisinin növbəti sessiyasının iyunun 25-i saat 11.00-da keçirilməsi qərara alınıb.

Bastainfo.com