AXCP sədri Əli Kərimli SOCAR-ın hazırda Fransada keçirilən futbol üzrə Avropa Çempionatına sponsorluq etməsinə münasibət bildirib. AXCP lideri feysbuk səhifəsində yazıb:
"Günəşli” yatağındakı yanğın zamanı həlak olmuş neftçilərin ailələrinə vəd etdiyi kompensasiyanı verməyən SOCAR-ın nə haqqı var ki, futbol üzrə Avropa Çempionatına sponsorluq etsin? Məgər SOCAR Rövnəq Abdullayevin və şirkətdə ətrafına yığdığı qohum-əqrəbasının şəxsi şirkətidir ki, ağıllarına gələni etsinlər? SOCAR dövlət şirkətidir. Onun idarə etdiyi sərvət bizim hamımızındır. SOCAR sponsorluq etməsə, Avropa çempionatını keçirə bilməyəcək? Təkcə bu çempionatın keçirilməsindən 2 milyard avro qazanacaq Fransanın SOCAR-ın neftçi ailələrindən kəsdiyi pula ehtiyacı var? SOCAR niyə oturub 8 milyard dollarlıq xarici borcunun, ötən ili 1 milyard manat ziyanla başa vurmağının dərdini çəkmir? Məsələ aydındır, bizlər vətəndaş olaraq öz haqlarımıza sahib çıxıb, hər bir korrupsionerdən məsuliyyət tələb edənə qədər bu talançılıq davam edəcək.