Emil Rahiloğlu: "Günahlarımızın bağışlanmasını, ibadətlərimizin qəbul olmasını istəyiriksə, ilk olaraq valideynləri razı salmalıyıq”
İslam dinində valideynə itaət Allahdan sonra insanlar üçün ən üstün dəyər hesab olunur. Bu barədə Qurani-Kərimdə də kifayət qədər ayələr mövcuddur. Lakin məsələnin nəzərə çarpan digər tərəfləri bundan ibarətdir ki, mübarək Ramazan ayında valideyn haqlarına daha çox diqqətli olmağa bir çağırış var. İstər müqəddəs ay başlamazdan öncə, istərsə də Qədr gecələrindən əvvəl ata və anadan hallalıq almaq, onların qəlbini ovundurmaq ciddi şəkildə təkid olunur..
Bəs görəsən insanın taleyini və həyatı müqəddaratını həll edən mübarək Ramazan ayında valideyn haqlarına bu dərəcədə diqqət çəkilməsinin səbəbi nədir?
"İslaminSesi" mövzunu ilahiyyatçı alim Emil Rahiloğlu ilə müzakirə edib. İlahiyyatçı öncə saytımızın kollektivini, İslam dininin maarifi üçün zəhmət çəkənləri və müsəlmanları bu böyük rəhmət ayının gəlişi münasibəti ilə təbrik edib. Uca Allahdan bu ayda bağışlanmaq diləyib. Emil Rahiloğlu bildirib ki, müraciət olunan mövzu nəinki bu mübarək ayda, hətta bütün zamanlarda daha çox diqqət və əməl olunası bir məsələdir: "Allahın Rəsulundan günümüzə gəlib çatan hədisdə İslam Peyğəmbəri valideyn haqqı barədə suala belə cavab verir: "Birkişirəsulallahdan(s) soruşdu : " Valideyinin övlad üzərində haqqı nədən ibarətdir?Peyğəmbər(s)buyurdu : " Onlar sənin cənnətin ve cəhənnəmindir ". Allahın rəsulu (s) insan ömrünün xülasəsini öz mübarək kəlamında qeyd etmişdir. Valideyn haqqı insanın müqəddəratını təyin edir. Kimsə buna qarşı laqeyd olarsa, sözün əsl mənasında özünə və axirətinə qarşı biganəlik edər. Kimsə gecələri namaz qılıb, gündüzləri oruc tutsa, amma bu müqəddəs haqqa dəyər verməsə və valideynləri ondan narazı qalsa, demək ki, İlahi mərtəbədə həmin şəxs gecələri oyaq, gündüzləri isə ac qalmış hesab olunacaqdır.
İlahiyyatçının sözlərinə görə, hər bir tədbirin və münasibətin öz mövzusu olmaqla yanaşı formatı da fərqlidir: "Biz toya daxil olduğumuz əhval-ruhiyyə ilə yasa və digər tədbirlərə daxil olmuruq. Çünki uşaqlardan fərqli olaraq ağıl və təcrübə vasitəsi ilə harada necə rəftar edəcəyimizdən xəbərdarıq.
Yaxud xeyrimiz üçün çalışan və əlindən gələni əsirgəməyən dostumuz bizi barəsində elə də ciddi məlumatımız olmayan bir şəhərə dəvət edir. Artıq qabaqcadan həm özümüzə, həm də dostumuza ünvanladığımız suallar başlayır. Ora necə yerdir, insanları necədir, mən daha çox necə rəftar etsəm orada daha da naliyyətlər əldə edə bilərəm? Özümlə geyim nə götürüm? Şəhərə giriş vizası varmı və sair. Amma biri də var ki, həmin dostumuz bizi şəhərə dəvət etməklə, yaranacaq bütün suallara cavab məktubu yollamaqla yanaşı, şəhərin bizim üçün daha faydalı olması səbəbindən zəruri mövzulara da toxunur. Bizim bu mübarək Ramazan barəsində və bu ayda baş verəcək önəmli hadisələr haqqında sadəcə tanışlığımız mövcuddur. Həmçinin bu tanışlıq bizim ağıl və təcrübəmiz sayəsində deyil, əksinə ayə və hədislər vasitəsi ilədir. Bildiyimiz kimi bu ayda Allah-taala insanı öz mənəvi süfrəsinə dəvət edir. Bu ayın hər bir saniyəsini digər aylardan fərqli olduğunu qeyd edir. Həmçinin insanları bu aydan daha çox yararlanmağa dəvət etməklə yanaşı, onlara müqəddəratlarının məhz Ramazanda yazıldığını söyləyir”.
Emil Rahiloğlu qeyd edib ki, bu aydan daha səmərəli istifadə edərək, günahlarımızın bağışlanmasını, ibadətlərimizin qəbul olmasını istəyiriksə, ilk olaraq valideynləri razı salmalıyıq: "Çünki bunu bizə Alllah əmr edir. Əks halda bu ziyafətdə çağırılmamış qonaq kimi olacağıq. İnsan şakir olmağının sübutu olaraq onu dünyaya gətirən valideynlərin haqqını əda etməli, onları razı salmalı və daha sonra əsl şükür sahibinə tərəf üz tutmalıdır. Valideynin haqqına əməl etmək, İlahi haqqın müqəddiməsidir. Bunu uca yaradanımız bizdən bu şəkildə tələb edir”.
