Bu gün Rusiya prezidenti Vladimir Putin tərəfindən əfv edilən ukraynalı pilot Nadejda Savçenko Kiyevin Borispol aeroportunda böyük coşqu ilə qarşılanıb.
Modern.az Ukrayna KİV-nə istinadən xəbər verir ki, Savçenko keçmiş baş nazir Yuliya Timoşenkonun gül buketini qəbul etməkdən imtina edib. O, aeroportda emosional çıxış edib.
"Mən ölənləri geri qaytara bilmərəm, amma öz həyatımı yenə döyüş meydanında qoymağa hazıram. Hər şeyi edəcəm ki, məhbəsdə olanlar azadlığa çıxsınlar. Həyatımı Ukraynaya verməyə hazıram. Mən hələ də sağ qaldığım üçün müharibədə övladlarını itirən analardan üzr istəyirəm. Mənə yaxşılıq arzu edənlərə təşəkkür edirəm, sizin sayənizdə həyatda qala bildim. Mənə pislik arzulayanlara təşəkkür edirəm ki, sizin acığınıza sağ qaldım. Laqeyd insanlara da təşəkkür edirəm, siz mənə mane olmurdunuz”.
Heç kəsdən gül buketi qəbul etməyən Nadejda Savçenko onların anasına verilməsini istəyib. Savçenko bir neçə saatdan sonra geniş mətbuat konfransı keçirəcəyini deyərək, xüsusi zirehli maşınla aeroportun ərazisini tərk edib.