Müsavat Partiyası "Basta” xəbər portalına qarşı təzyiqlərin dayandırılmasını tələb edib.
Partiyanın bununla bağlı yaydığı bəyanatda deyilir:
"Azərbaycanda söz azadlığına qarşı hakimiyyətin təzyiqləri davam etməkdədir. Milli Məclis "Basta” xəbər portalının və onun baş redaktoru Mustafa Hacıbəylinin barəsində ciddi ölçü götürülməsi haqqında Mətbuat Şurasına rəsmi müraciət edib.
Müraciətdə iddia olunur ki, "Bastainfo.com” saytında dərc olunan "Milli Məclis haradadır?” sərlövhəli məqalədə parlamentin və deputatların şərəf və ləyaqətinə toxunan qərəzli fikirlər yer alıb. Halbuki həmin məqalədə nəinki hər hansı bir qərəzli fikir yer almayıb, əksinə, cəbhə xəttində hərbi əməliyyatların aparıldığı nəzərə alınaraq, münaqişənin qızışdığı dövrdə parlamentin bu məslədə passivlik nümayiş etdirməsi faktı haqlı olaraq tənqid olunub.
Müsavat Partiyası hesab edir ki, "Basta” xəbər portalına qarşı təzyiqlər, onun prinsipial mövqeyi və artan nüfuzu ilə bağlıdır. Müsavat Partiyası Milli Məclisin bu müraciətini Azərbaycanda müstəqil medianın susdurulmasına yönələn qanunsuz addım kimi qiymətləndirir, hakimiyyət orqanlarını tənqidə dözümlə yanaşmağa çağırır və söz azadlığına qarşı basqılara son qoyulmasını tələb edir”.
