Azərbaycan Televiziya və Radio Verilişləri Qapalı Səhmdar Cəmiyyətinin sədri Arif Alışanovun işdən çıxarılacağı, AzTV-də ciddi maliyyə yoxlamaları aparılacağı barədə xəbərlərdən sonra indi də belə söz-söhbətlər gəzir ki, Arif Alışanovun yerinə AzTV-yə rəhbər professor Qulu Məhərrəmli gətiriləcək.

 Ölkə.az-a məlumat verən və adının çəkilməsini istəməyən şəxs bildirir ki, professor Qulu Məhərrəmli ilə Arif Alışanov arasında açıq şəkildə tüğyan edən çəkişmələr Azərbaycan Televiziya və Radio Verilişləri Qapalı Səhmdar Cəmiyyətinin sədrinin vəzifədən getməsini daha da sürətləndirəcək.

Daxil olan informasiya ilə bağlı professor Qulu Məhərrəmli ilə əlaqə saxladıq. Qulu Məhərrəmli bildirdi ki, bu məlumat onun da qulağına gəlib çatıb.

Məsələnin detalları barədə heç nə deyə bilməyəcəyini bildirən Qulu Məhərrəmli qeyd etdi ki, gələcəkdə nə baş verəcəyini hər kəs görəcək.

Qeyd edək ki, Azərbaycan Televiziya və Radio Verilişləri QSC-nin Sədri Arif Alışanovla AMEA-nın Nəsimi adına Dilçilik İnstitutunun şöbə müdiri, jurnalist Qulu Məhərrəmli arasında son günlər mediada gedən qarşılıqlı ittihamlardan sonra Arif Alışanov Qulu Məhərrəmlini məhkəməyə verib.