Ermənistanın paytaxtı İrəvanda izdihamlı yürüş-mitinq keçirilib. Musavat.com bu barədə
Ermənistan mətbuatına istinadən məlumat verir. Aksiyada qondarma "Dağlıq Qarabağ
Respublikası”nın "bayraqları və "Levon Ayrapetyana azadlıq” plakatları qaldırılıb.
Hüquq-mühafizə orqanlarının çoxsaylı əməkdaşlarının iştirakı ilə baş tutan
aksiyada iştirakçılar ötən həftə erməni biznesmen Levon Ayrapetyan
barəsində hökm çıxaran Moskvanın Zamoskvoretsk rayon məhkəməsinin
qərarına etiraz edib. Xatırladaq ki, erməni milyarder dələduzluqda ittiham
edilərək 4 illik həbsə məhkum edilib. O, Rusiyada 700 min dollar vəsaiti
mənimsəməkdə təqsirli bilinir. Vəkillər 2-ci qrup əlil olan Ayrapetyanın
bir neçə dəfə infarkt və insult keçirdiyini, üstəlik xərçəng xəstəsi olduğunu
iddia edirlər.
Bugünkü aksiyanın iştirakçıları Respublika meydanından xarici işlər nazirliyinin
binasına, oradan isə Rusiyanın səfirliyinə qədər yürüş edərək tələblərini təqdim
ediblər.
Panorama.am xəbər verir ki, etirazçılar XİN-dən təcili şəkildə Moskvadakı
kolleqaları ilə əlaqə yaradıb Ayrapetyanın azadlığına nail olunmasını istəyiblər.
Aksiyaçılar arasında L.Ayrapetyanın qızı da olub. Rusiyanın səfirliyinə təqdim
olunan məktuba isə Ayrapetyanın azad olunması üçün toplanın15 min imza
da əlavə olunub
Xatırladaq ki, dünyanın əfv varlı erməniləri siyahısında olan L.Ayrapetyan
Dağlıq Qarabağdakı separatçı rejimin əsas sponsorudur. Məlumata görə, o,
Başqırdıstanın sabiq senatoru İqor İzmestyevin anasından hökmün
yumşalmasında kömək üçün 700 min dollar götürüb, ancaq real olaraq hökmə
təsir etməyi bacarmayıb. "Başneft” işi ilə əlaqədar mənimsəmə və çirkli pulların
yuyulmasında ittihamı ilə 2014-cü ilin iyul ayında həbs olunub. Keçən il
sentyabrın 16-da başqa yerə getməmək şərti ilə ev dustaqlığına buraxılıb.
Ermənistanın və Qarabağdakı separatçı rejimin ağır günlərində milyarderin
Rusiyada həbs olunmasını ermənilər özlərinə qarşı böyük zərbə sayırlar.
Cavid TURAN
Musavat.com
