ABŞ Müdafiə Nazirliyi hakerlərə müraciət edib.

İKT.lent.az-ın xəbərinə görə, müraciətdə hakerlər qeydiyyatdan keçərək "Pentaqonu sındır” (Hack the Pentagon) xüsusi proqramında iştirak etməyə dəvət olunub. Bu pilot proqram Pentaqonun saytındakı boşluqların aşkarlanaraq aradan qaldırılmasına hesablanıb.  

Nazirlik proqramı həyata keçirmək üçün Silikon vadisindəki nüfuzlu şirkətlərdən birini cəlb edəcək. Aprelin 18-də start veriləcək proqram mayın 12-də yekunlaşacaq. "Sındırılma” əməliyyatının iştirakçılarına kvalifikasiya sertifikatları veriləcək. "Proqram nazirliyin hər kəsə açıq olan bir neçə saytının "sındırılmasına” yönəlib. Kritik önəmə sahib kompüter sistemləri bu testlərə daxil edilməyəcək”, - deyə Pentaqonun mətbuat katibi Piter Kuk bildirib.    

Proqramda yalnız ABŞ vətəndaşı olan şəxslər iştirak edə bilər. Onların terrorçuluq, narkotiklərin qanunsuz dövriyyəsi və digər cinayətlərlə hər hansı əlaqəsi olmamalıdır.

Xatırladaq ki, 2015-ci ildə Pentaqon dəfələrlə güclü haker hücumlarına məruz qalıb. Ötən ilin aprel ayında müdafiə naziri Eşton Karter rusiyalı kibercinayətkarların Pentaqonun şəbəkəsinə daxil ola bildiklərini açıqlayıb.