Bu gün ermənilərin Bakıda və Qubada soyqırım törətməsinin 98-ci ildönümüdür.
Tariximizin bu qanlı səhifəsinin ildönümü ilə əlaqədar bu gün Müsavatın rəhbərliyi və partiyanın bir qrup üzvü Şəhidlər Xiyabanında türk Şəhidliyini ziyarər ediblər. Bakının erməni-rus istilasından azad olunması uğrunda döyüşlərdə şəhid olan türk əsgərlərinin xatirəsi yad edilib, onların xatirəsinə ucaldılmış abidə önünə gül dəstələri qoyulub.
Tədbirdə Müsavat başqanı Arif Hacılı və Milli Strateji Düşüncə Mərkəzinin sədri İsa Qəmbər çıxış ediblər. Çıxışlarda erməni-rus hərbi birləşmələrinin Azərbaycanda törətdiyi qətliam və ölkənin işğaldan azad olunması üçün canını fəda etmiş türk əsgərlərinin qəhrəmanlığı qeyd edilib.
***
Bu gün bir qrup müsavatçı Quba rayonunda da azərbaycanlıların soyqırım abidəsini ziyarət ediblər. Tədbirdə Müsavat Partiyası İcra Aparatının rəhbəri Gülağa Aslanlı, Divan üzvü Vəfa Cümşüdlü, Müsavat başqanının müşavirləri Ramazan Əliyev və Dadaş Əhmədli iştirak ediblər. Müsavatçılar şəhidlərin xatirəsini yad edib, soydaşlarımızın kütləvi məzarlağına gül dəstələri qoyublar.
Müsavatçılar həmçinin Quba Soyqırım Memorial Kompleksində olublar. Bələdçi Abutalib Talıbov kompleksdəki ekspanatarla müsavatçıları tanış edib. Gülağa Aslanlı komleksdəki xatirə kitabına rəy yazıb.
Mustafa Hacıbəyli, bastainfo.com
