Adları çəkilən QHT rəhbərlərindən bir neçəsi fakta münasibətlərini bildiriblər. Qalib Toğrul musavat.com-a açıqlamasında qeyd edib ki, bu məsələdə bir qədər gözləmək daha məqsədəuyğundur: "Gözləyək ki, sular durulsun. Ortada real heç nə yoxdur. Gözləyirik ki, hesabımızla bağlı məsələ dəqiqləşsin. Ölkədən çıxmışam, daha məni yoxlamırlar, bu, götürülüb. Ancaq digər məsələlər hansı səviyyədə həll olunub, onu bilmirəm. Hazırda dəqiqləşdirmə gedir”.

Zöhrab İsmayıl isə sualları cavablandırmaq istəmədiyini bildirib. 

Elçin Abdullayev qeyd edib ki, bu xəbəri sosial şəbəkələrdən, mətbuatdan, Mədən Sənayesində Şəffaflığın Artırılması Koalisiya Şurasının koordinatoru Əliməmməd Nuriyevin müsahibələrindən oxuyub: "Belə bir qərarın olmasına şübhəm yoxdur. Yəqin hər hansi bir siyasi qərar var ki, Əliməmməd Nuriyev bu fikri səsləndirib. Onun fikirlərinin səmimiliyinə şübhə etmirəm. Bizim ölkədə siyasi qərar olmadan, hər hansi məsələnin hüquqi həlli mümkünsüzdur. Bildiyiniz kimi, rəhbərlik etdiyim təşkilat insan hüquqları sahəsində, xüsusilə QHT-lərə hüquqi yardımla məşğul olan təşkilatdır. Biz bütün qərarlarımızı və fəaliyyətimizi hüquqi sənədlərə əsasən qururuq. Bu baxımdan, problemin həll olunmasının rəsmi sənədlərdə əks olunmasını görmək istəyirik.   

Dünənə qədər bizim bank hesablarımızda həbslər və vergi cərimələri durur. Yəqin ki, növbəti həftələrdə biz bunun bir daha dəqiqləşdirilməsini aparacağıq. Digər tərəfdən, rəhbərlik etdiyim QHT-yə qarşı cinayət təqibinin və ya cinayət işinin olub-olmamasını müəyyənləşdirmək üçün Baş Prokurorluğun Ağır Cinayətlərə Dair İşlər üzrə İstintaq İdarəsinə rəsmi müraciət ünvanlamışıq və bununla bağlı hər hansı rəsmi cavab almamışıq. Düzdür, təşkilatımıza məxsus olan sənədlər və digər texniki avadanlıqlar bir müddət sonra idarə tərəfindən bizə geri verilib. Digər tərəfdən, təşkilatımızın vergi cərimələri var. Bu cərimələrin olub-olmamasına dair Vergilər Nazirliyinə sorğu ilə müraciət edəcəyik.  Rəsmi cavablardan sonra ictimayyətə açıq müraciət edəcəyik”.

Onun fikrincə, ölkəyə qayıtdıqdan sonra təzyiqlərin davam etməsi onun üçün əhəmiyyətli deyil: "Bildiyiniz kimi, biz hazırda Almaniyaya təhsil təqaüd proqrami çərçivəsində gəlmişik. Bu proqram uzunmüddətli proqramdır. Ən azından 2019-cu ilin sentyabrına qədər davam edəcək. Bu baxımdan, yaxın illərdə Azərbaycana qayıtmaq haqqında düşünmürəm. Doğrusu, təzyiqlərin davam etməsi mənim üçün artıq əhəmiyyətli deyil. Çünki hər zaman təzyiqlər mövcud olub. Əhəmiyyətli odur ki, artıq mövcud qanunvericilik və mövcud şəraitdə QHT-lərin əvvəlki kimi fəaliyyət göstərmək imkanları məhduddur. Ona görə yaxın perspektivdə QHT-lərin səmərəli və effektiv fəaliyyətinin olmasını gözləmək sadəlövhlük olardı. Bu gün güclü vətəndaş cəmiyyəti ən çox hökumətə lazımdır”.(musavat.com)