Məhkəmə hökmü qüvvəyə minmədən dustaqlar CÇM-nə köçürülüb
Tanınmış vəkil Əsabəli Mustafayev Ədliyyə sistemindəki daha bir biabırçılıq barədə məlumat yayıb. O, müdafiə etdiyi şəxlərin qanunsuz olaraq cəzaçəkmə müəsissəsinə köçürülməsi barədə öz feyzbuk səhifəsində qeydini paylaşıb:
"İndicə məlumat aldım ki, müdafiə etdiyim 4 nəfər "nurçu”nu istintaq təcridxanasından cəzaçəkmə müəssəsinə göndəriblər. Halbuki bu adamlar barəsində hökm hələ qanuni qüvvəyə minməyib, apellyasiya instansiyasındadır. İndi Ədliyyə Nazirliyi və istintaq təcridxanası ilə telefonla danışdım. Deyirlər ki, dustaqları saxlamağa yer çatışmayır, ona görə göndəririk cəzaçəkmə müəssəsinə. Bu tutulan şəxslər yalnız dini məzmunlu kitablar oxuduqları üçün məhkum olunublar. İnsanlar heç bir cinayət etmədikləri halda məhkum olunurlar, sonra da kamera çatışmayır, yenə qanunu pozaraq onları hökm qüvvəyə minməmiş cəzaçəkmə müəssəsinə göndərirlər. Bu adamlar barəsində həbs qətimkan tədbirinin qanunsuzluğu barədə ərizələr artıq Avropa Məhkəməsindədir.İndi də hökm qüvvəyə minməmiş icra edilməsi barədə şikayət göndəriləcək.”
Vəkil həmçinin bu qanunsuz əməldən məhkəməyə şikayət edəcəyini də vurğulayıb.
"Bayramlardan sonra da penitensiar xidməti məhkəməyə verməli olacağam. Bu orqanlar vəkili bir az asudə qalmağa imkan vermir ki, vermir”,- deyə tanınmış vəkil bildirib.