"Hövsələdən çıxmayan bir Etibar Məmmədov qalmışdı..."
Noyabrın 4-də Bakı Ağır Cinayətlər Məhkəməsində jurnalist Rauf Mirqədirovun hazırlıq iclası keçirilib. Prosesə jurnalistlər Mehman Əliyev, Rövşən Hacıbəyli, Əvəz Zeynallı, siyasilərdən Müsavat Partiyasının başqanı Arif Hacılı, İsa Qəmbər, Elman Fəttah da qatılıb. Ancaq Azərbaycan Milli İstiqlal Partiyasının rəhbərliyindən heç kəs məhkəmədə iştirak etməyib.
Bununla bağlı Meydan.tv-nin əməkdaşı AMİP lideri Etibar Məmmədova sual ünvanlayıb və məhkəməyə niyə qatılmadıqlarını soruşub.
Jurnalistin "Niyə məhkəmədə iştirak etmədiniz, amma İsa Qəmbər orada idi?" sualına Etibar Məmmədov "Hansı cəhənnəmdə olur-olsun, mənə onun nə dəxli var?! İşin-gücün qurtarıb ki, təxribatla məşğul olursan?" cavabını verib.
Məsələyə Müsavar Partiyasının sabiq başqanı, Milli Strateji Düşüncə Mərkəzinin rəhbəri İsa Qəmbərin də cavabı gecikməyib.
Arqument.Az xəbər verir ki, İsa Qəmbər Məmmədovun əsəbi atmacasına yumorla cavab verib: "Bu məmləkətdə hövsələdən çıxmayan bir Etibar Məmmədov qalmışdı, onu da Natiq Cavadli hövsələdən çıxardı:) Etibar da Əliyev rejiminin məhkəmələrini cəhənnəmə bənzətdi. Amma əgər, rejim azadlıq uğrunda mübarizə aparanları öz "cəhənnəminə" salırsa, biz də bu insanlara dəstək vermək üçün o "cəhənnəmə" getməliyik. Ümumən, insan azadlıq uğrunda cəhənnəmə getməyə hazır olmalıdır ki, cənnətə bu dünyada şansı, o dünyada haqqı olsun".(arqument.az)
