Rusiyanın məşhur "Kavkazski uzel" portalı Azərbaycanda keçirilmiş son seçkilər haqqında növbəti reportajını yayınlayıb.
"Müsavat Partiyası seçkilrərin nəticələrini tanımadı" başlığı ilə dərc edilən yazıda hakim partiyanın yenidən parlament çoxluğunu əldə etməsi ilə nəticələnən bu seçkilərin saxtalaşdırılmasından və Müsavatın təkrar seçki tələbindən bəhs edilir. Müsavat başqanı Arif Hacılının seçkinin yekunları ilə bağlı keçirdiyi mətbuat konfransında verdiyi açıqlamalara da yazıda yer verilib. Arif Hacılıya istinad bildirilib ki, seçkilər qeyri-demokratik mühitdə və hakimiyyətin tam nəzarəti altında olan seçki komissiyaları tərəfindən və bərabər rəqabət imkanlarının mövcud olmadığı şəraitdə keçirilib. Məhz bu səbəbdən Müsavat oktyabrın 28-də seçkidən çıxmaq haqqında qərar verib.
Yazıda daha sonra Arif Hacılının "seçicilərin cəmi 10 faizə qədəri səsvermədə iştirak edib, bu, əhalinin seçkiyə və hakimiyyətə münasibətinin göstəricisidir" fikri öz əksini tapıb.
Reportajda həmçinin Müsavatın seçki qərargahının sədri Gülağa Aslanlının və hüquqşünas Ələsgər Məmmədlinin fikirləri öyrənilib. Gülağa Aslanlı seçki dairələrinin dördə birindən çoxunda kobud qanun pozuntuları haqqında faktlara malik olduqlarını, saxtakarlıq faktları ilə bağlı məhkəməyə müraciət ediləcəyini və seçkilərin nəticələrin ləğv olunması üçün bütün hüquqi əsasların olduğunu bildirib. Bu fikirləri bölüşən Ələsgər Məmmədli isə, seçkilərin nəticələrinin ləğv olunması üçün hüquqi əsasların mövcud olmasına rəğmən, Azərbaycan reallığında bunu müşkül saydığını vurğulayıb.
bastainfo.com