"Bu iştirak etdiyim dördüncü parlament seçkisidir. Ən biabirçısı isə bu dəfəki seçkilər oldu”. Bu sözləri Cebhe.info-ya 30 sayli Suraxanı I Seçki Dairəsindən namizəd kimi seçkilərdə iştirak etmiş Vurğun Əyyub deyib. Onun sözlərinə görə, namizəd olduğu dairənin bir neçə məntəqəsində "karusel” əməliyyatı həyata keçirilib:
"Görünür bu, hesabat aparanlara kifayət etməyib. Seçkinin sonunda qutulardan bülletenlərin sayı əhəmiyyət daşımadı. İstədikləri rəqəmləri, istədikləri şəkildə yazdılar və böyük səs üstünlüyü ilə YAP-ın namizədinə səs veriblər. Sevinc Fətəliyevaya o qədər yüksək səs yazıblar ki, digər namizədlərin nə qədər səs toplamasının əhəmiyyəti qalmayıb”.
Vurğun Əyyub qeyd edib ki, seçki prosesində izlənilən saxtakarlıqlar təkcə Sevinc Fətəliyevanın xeyrinə səs toplamaq həvəsi deyil, həmçinin 30 saylı Suraxanı I Seçki Dairəsindən səs verən vətəndaşlara təhqirdir: "Məntəqələrdə olan qanun pozuntuları ilə bağlı bütün materiallar seçki qərargahında toplanıb. Şikayətlər, aktlar və digər nöqsanlarla bağlı materiallarla Mərkəzi Seçki Komissiyasına müraciət edəcəyəm”.
Alçina Amilqızı
Cebhe.info