Tələb Qəbulu üzrə Dövlət Komissiyasının (TQDK) keçmiş mətbuat katibi Elnur Nağızadəyə qarşı cinayət işi başlayıb, barəsində axtarış elan olunub.
Baş Prokurorluqdan Turan-a verilən məlumata görə, keçmiş məmur CM-in 178.3.2 (fırıldaqçılıq), 308.1 (vəzifə səlahiyyətlərindən sui-istifadə) və 320.1-ci (sənədlərin, möhürlərin, damğaların saxtalaşdırılması) maddələri ilə ittiham olunur. Məhkəmənin qərasında onun barəsində qiyabi olaraq qətimkan tədbiri seçilib.
Cinayət işi Bakı şəhər sakinləri Vüsal İbrahimovun və Zaur Əsgərovun şikayətləri ilə əlaqədar açılıb. Onlar keçmiş məmurun 2015-ci ilin avqustunda gəlirli işə düzəltmək vədi ilə onlardan 150 min dollar aldığını iddia edirlər.
Sonradan o, TQDK-da tutduğu vəzifədən azad edilib və qeyri-rəsmi məlumatlara görə, hazırda Azərbaycan hüdudlarından kənardadır.
