Tiflisdə Gürcüstan hökumətinin "Qazprom”la danışıqlarına qarşı kütləvi etiraz aksiyası keçirilib.
Publika.az Gürcüstan mediasına istinadən xəbər verir ki, bazar günü keçirilən aksiyada etirazçılar Rusiya səfirliyinin binasından hökumət evinə qədər olan 7 kilometr uzunluğundakı yolda zəncirvari şəkildə düzülüblər.
Nümayişçilər "Qazprom”dan qaz alınmasının Gürcüstanı Rusiyadan asılı vəziyyətə salacağından qorxurlar.
Aksiyanı "Vahid Milli Hərəkat” (Saakaşvilinin keçmiş partiyası – red.) partiyası təşkil edib.
Qeyd edək ki, ötən həftənin cümə günü Gürcüstanın energetika naziri Kaxe Kaladze Azərbaycanla razılaşdıqlarını və "Qazprom”dan əlavə qaz almayacaqlarını bəyan edib.
Lakin parlamentdəki müxalifətin lideri David Bakradze iddia edib ki, hakimiyyəti onları aldadır.
"Gürcüstan ictimaiyyəti bu hökumətə ölkənin enerji təhlükəsizliyini məhv etməyə imkan verməyəcək. Biz icazə verməyəcəyik ki, Gürcüstan Rusiyanın idarəçiliyi altına düşsün”, - deyə müxalifət lideri bildirib.