Müsavat Partiyasının başqanı Arif Hacılı Novella Cəfəroğlunu yubileyi münasibəti ilə təbrik edib. Təbrikdə deyilir:
"Hörmətli Novella xanım!
Sizi yubileyiniz münasibəti ilə təbrik edir, Sizə uzun ömür, cansağlığı, işlərinizdə müvəffəqiyyətlər arzulayıram.
Siz, Azərbaycan Xalq Hərəkatının ilk günlərindən onun sıralarına qoşulmuş, ölkəmizin müstəqilliyi və ərazi bütövlüyü uğrunda gedən mübarizənin fəal nümayəndələrindən biri olaraq, bu hərəkatın amallarına və onun lideri Əbülfəz Elçibəyə sonsuz sədaqəti ilə tanınan şəxslərdənsiniz.
2003-cü il Prezident seçkilərindən sonrakı günlərdə Müsavat Partiyasına qarşı repressiyalar zamanı Siz "Rəsulzadə-Elçibəy” fraksiyasının üzvləri ilə birlikdə Müsavat Partiyasına üzv qəbul olunaraq, cəsarət nümunəsi göstərdiniz. Uzun illər partiya Məclisinin üzvü kimi müsavatçılıq ideyalarının təbliğində və yayılmasında yorulmadan fəaliyyət göstərmisiniz.
D.Əliyeva adına Qadın Hüquqları Müdafiə Cəmiyyətinin sədri kimi fəaliyyətiniz beynəlxalq təşkilatlar tərəfindən "Marşall” mükafatına layiq görülməyinizə səbəb olub.
Siz müxalifətin və Müsavat Partiyasının keçirdiyi etiraz aksiyaları və tədbirlərində fəal iştirakçı olmusunuz.
Fəaliyyətiniz dövründə dəfələrlə təqib və təzyiqlərlə üzləşsəniz də hər zaman insan haqları uğrunda fəaliyyətinizi davam etdirmisiniz.
Siz həm də mehriban, qayğıkeş həyat yoldaşı, ana və nənəsiniz. Siz övladlarınız və ailə üzvlərinizlə fəxr etdiyiniz kimi, onlar da hər zaman Sizinlə qürur hissi keçirərək, Sizin kimi bir insanın övladı olmağı ilə fəxr edirlər.
Hörmətli Novella xanım!
Bir daha Sizi yubileyiniz münasibəti ilə təbrik edir, Sizə uzun ömür, cansağlığı, şəxsi həyatınızda xoşbəxtlik və apardığınız bu şərəfli mübarizə yolunda uğurlar arzulayıram”.